Նախկին բարձրաստիճան պաշտոնյա, 2008 թվականի «մարտի 1»-ի գործով փաստահավաք խմբի նախկին անդամ Անդրանիկ Քոչարյանը համամիտ էր մեր այն դիտարկմանը, որ երեկ, ռուսական NTV հեռուստաընկերությանը տված ՀՀ երկրորդ նախագահ Ռոբերտ Քոչարյանի հարցազրույցը մարտական էր: Այդ հարցազրույցում Ռոբերտ Քոչարյանը հայտարարել էր, որ ինքը կարող է համախմբող առանցք դառնալ:
«Ռոբերտ Քոչարյանը մարտական է տրամադրված, բայց ես կցանկանայի, որ նմանատիպ, շատ ավելի մարտական տրամադրված լինի «մարտի 1»-ի բացահայտման հարցով ամբողջ դատաիրավական համակարգը: Դրանով ամբողջ խնդիրը լուծվում է»,- Aravot.am-ի հետ զրույցում ասաց Անդրանիկ Քոչարյանը:
Դիտարկմանը` կյանքը ցույց տվեց, որ դատաիրավական համակարգը միասնական չէ, մեր զրուցակիցն արձագանքեց. «Դրա համար էլ Ռոբերտ Քոչարյանը շատ մարտական է տրամադրված: Եթե դատաիրավական համակարգը լիարժեք, բավականին ինքնավստահ, ընդ որում` ոչ միայն ՀՔԾ-ն, այլ բոլորը`ոստիկանություն, ԱԱԾ, միասնական, մեկ ընդհանուր ճակատով իրականացնեն «մարտի 1»-ի լիարժեք բացահայտումը, ոչ թե հատվածական, այլ` ամբողջական, այդ ժամանակ չեմ կարծում, որ Ռոբերտ Քոչարյանն այդքան մարտական հարցազրույցներ փորձի տալ»:
Նելլի ԳՐԻԳՈՐՅԱՆ
