Հայաստանի 10 մետաղական եւ 146 ոչ մետաղական հանքավայրեր շահագործող ընկերություններին նախարարության կողմից տրվել են զգուշացումներ, այդ ոլորտում իրականացված ուսումնասիրություններից հետո արձանագրվել են շահագործման օրինականության խախտումներ: Այսօր այս մասին լրագրողների հետ հանդիպման ժամանակ ասաց էներգետիկայի եւ բնական պաշարների նախարար Արթուր Գրիգորյանը` ամփոփելով պաշտոնավարման 100 օրը:
Նախարարի խոսքերով՝ նախարարության կողմից զգուշացվելուց հետո հանքավայրեր շահագործող ընկերությունները պարտավոր են վերացնել առկա թերություններն 90 օրվա ընթացքում, իսկ եթե չվերացնեն, ապա կզրկվեն լիցենզիայից:
Նախարարն ասաց, որ հանքարդյունաբերության ոլորտում կատարվել է լուրջ եւ խորը ուսումնասիրություն. «Դուք գիտեք, որ վարչապետի դիրքորոշումն այդ առումով բավական խիստ է, եւ հանքարդյունաբերության ոլորտը պետք է բերվի իրավական դաշտ»:
Անդրադառնալով Ամուլսարը շահագործող «Լիդիան Արմենիա» ընկերության խնդիրներին (արդեն մեկ ամիս է այնտեղ ընդդեմ հանքի շահագործման բողոքի ցույց է իրականացվում) ` Արթուր Գրիգորյանը հիշեցրեց, որ բնապահպանության եւ ընդերքի տեսչական մարմինն ուսումնասիրություններ է իրականացնում:
Նախարարը հանքի շահագործման շուրջ ստեղծված իրավիճակը ցավոտ գնահատեց.«Լուրջ ներդրումներ է իրականացրել ընկերությունը եւ պատրաստվում է իրականացնելու, բայց չենք կարող հաշվի չառնել այն բնապահպանական խնդիրները, որոնք բարձրաձայնվում են: Մենք պետք է ամեն ինչ անենք, որ չխաթարենք ներդրողի կողմից կատարված աշխատանքը, եւ առհասարակ, Հայաստան եկող ներդրումները»: Գրիգորյանն ասաց, որ այս առումով պետք է շատ զգուշավոր լինեն, սակայն նաեւ չմոռանան բնապահպանական խնդիրները:
Ըստ նախարարի` տեսչական մարմինը մի քանի խնդիր է hայտնաբերել, եւ այդ առիթով պատրաստում է ՇՄԱԳ (շրջակա միջավայրի վրա ազդեցության գնահատում) ուսումնասիրություն կատարել:
Բնապահպանների գնահատականով` հանքարդյունաբերության ոլորտում մեկ այլ ցավոտ խնդիր եւ խախտումներով շահագործվող հանքը Թեղուտն է: Այս խնդրին անդրադառնալով` նախարարը վստահեցրեց՝ Թեղուտին կառավարությունն առանձնահատուկ մոտեցում է ցուցաբերում. «Խնդիրը հիմնականում պոչամբարի պատվարի շինարարական ռիսկերի հետ է կապված, որի պատճառն այն է, որ ժամանակին ճիշտ տեխնիկական եզրակացություն չի եղել: Այդ ռիսկը թույլ չի տալիս գնալ բացարձակ աշխատանքների, եւ որպեսզի ճիշտ գնահատվի իրավիճակը, ժամանակավոր դադարեցվել է շահագործումը: Դա ցավալի իրավիճակ է, քանի որ 800 աշխատակից անգործ է մնացել»:
Գրիգորյանն ասաց, որ մտահոգված են այդ խնդրով, եւ փորձելու են հնարավորինս արագ լուծումներ տալ՝ հաշվի առնելով ռիսկերը.«Բայց մեզ համար առաջնահերթ է մնում հանքավայրի շահագործման անվտանգության խնդիրը»:
Նախարարի կարծիքով՝ Հայաստանի տնտեսության զարգացման համար կարեւոր է նաեւ հանքարդյունաբերությունը:
Նելլի ԲԱԲԱՅԱՆ
