Այսօր ԱԺ նիստում «Ելք» խմբակցության պատգամավոր Էդմոն Մարուքյանը հանդես եկավ հայտարարությամբ՝ «Վրաստանում սեպտեմբերի 15-ից կառավարության որոշում է ուժի մեջ մտնելու, որի համաձայն, հացահատիկը Հայաստան այլեւս չի կարող ներկրվել վերգետնյա տրանսպորտով: Ես խոսել եմ տրանսպորտային ընկերությունների ղեկավարների հետ, իրենք ասում են, որ տոննայի մեջ 50 դոլար կթանկանա, եթե միայն Փոթիով գա: Այնտեղ մոնոպոլ գործունեության հարց կա: Թե ի՞նչ հարց է` դա Վրաստանի ներքին գործն է, բայց եղբայրական պետություններ ենք, ես կարծում եմ, Հայաստան-Վրաստան բարեկամական խումբը պետք է զբաղվի այս հարցով նաեւ խորհրդարանական հարթակով, որովհետեւ ժամանակը շատ կարճ է»:
Մարուքյանը նշեց, որ եթե այս որոշումը ուժի մեջ մտնի, մենք լուրջ խնդիրներ կունենանք, առանց այն էլ հացը թանկացել է՝ ՌԴ-ում հացահատիկի թանկացման հիմքով: Նա առաջարկեց, որ փորձեն հարցը կարգավորել նաեւ դիվանագիտական խողովակով, կապվեն իրենց պատգամավոր ընկերների հետ Վրաստանում:
ԱԺ փոխխոսնակ Էդուարդ Շարմազանովն ասաց, որ Հայաստան-Վրաստան բարեկամական խմբի ղեկավարը ինքն է. «Մենք սեպտեմբերին, ամենայն հավանականությամբ` մինչեւ ամսի 15-ը, պաշտոնական այց կունենանք Վրաստան: Խորհրդարանն ամեն ինչ կանի, բայց կարծում եմ, այստեղ նախ եւ առաջ անելիք ունեն մեր հարգարժան կառավարության ներկայացուցիչները»:
Շիրակ Թորոսյանն ասաց, որ խոսել է Վրաստանի գործընկերների հետ, առաջիկա նիստում իրենք այդ հարցը բարձրացնելու են եւ փորձելու են բացատրություն ստանալ Վրաստանի կառավարությունից:
Հռիփսիմե ՋԵԲԵՋՅԱՆ
