Այսօր լրագրողները ՀՀԿ խմբակցության ղեկավար Վահրամ Բաղդասարյանից հետաքրքրվեցին՝ այս պահին ՀՀԿ-ն հակված է, որ գնան նոր խորհրդարանական ընտրությունների՞, թե՞ գտնում է, որ կարելի է աշխատել նաեւ այս խորհրդարանով: Նա պատասխանեց. «Եթե տեսնում եք, այս խորհրդարանն իր բնականոն հունով աշխատում է, եւ նման փաստաթուղթ մեր ձեռքի տակ չկա: Իսկ եթե չկա փաստաթուղթ` չկա քննարկում: Համենայնդեպս, մենք ԱԺ-ի աշխատանքը կարողանում ենք բնականոն ձեւով առաջընթացն ապահովել, եւ ես չեմ կարծում, որ հաջորդ ԱԺ-ն արդյոք ավելի՞ քաղաքական կլինի, քան այս ԱԺ-ն»: Նա ասաց, որ այն առաջարկությունները, որոնք ընդունվում են Ընտրական օրենսգրքում, ցույց են տալիս, որ գնում են կուսակցությունների տրոհման, այսինքն, մարդ-կուսակցությունների ստեղծման աշխատանքով, ու դժվար է ասել, թե դրա արդյունքում ԱԺ-ն ինչքանով քաղաքական կլինի:
Հարցին՝ հիմա երկրում տարօրինակ վիճակ է, երբ ԱԺ-ում մեծամասնությունն այլ ուժ է, բայց կառավարություն ձեւավորել է այլ ուժ, հետեւաբար մասնագետները գտնում են, որ պետք է ԱԺ-ն ցրել, դուք համաձա՞յն եք դրա հետ, Վահրամ Բաղդասարյանը պատասխանեց. «Կարող ենք հակառակն էլ պնդել: Այդ երեւույթը իրոք անբնական երեւույթ է, բայց երբ որ լինեն խոչընդոտներ, ինձ թվում է` առայժմ խոչընդոտներ չկան: Քաղաքական դաշտի հետաքրքրությունն այդ անբնական երեւույթներն են, հայերը սիրում են միշտ անբնական երեւույթներով առաջ շարժվել»:
Լրագրողները ճշտեցին՝ այսինքն, այս պահին ՀՀԿ-ն հակված է նրան, որ չի՞ պատրաստվում գնալ ԱԺ-ի ինքնալուծարման, Վահրամ Բաղդասարյանը պատասխանեց. «Չի եղել քննարկում, ես ունեմ իմ անձնական կարծիքը, որը հրապարակման ենթակա չէ»:
Հարցին՝ ընդունելի՞ է ձեզ համար Նիկոլ Փաշինյանի այն տարբերակը, որ հնարավոր է լինեն խորհրդարանական փոփոխություններ, նա օրինակ է բերում այն, որ իր հրաժարականից հետո ՀՀԿ-ն կարող է թաքուն իր ուզած վարչապետին անցկացնել, Վահրամ Բաղդասարյանը պատասխանեց. «Որեւէ անգամ նման քննարկում չի եղել, առաջին անգամ օգոստոսի 17-ին լսեցի այդ մոտեցումը, դրանից առաջ նման մտավախություն չի եղել: Քաղաքական նոր զարգացումների հետ կապված սահմանադրությունը իրոք փոփոխությունների կարիք զգում է, բայց նայած ինչ փոփոխությունների: ԱԺ-ով են ի վիճակի փոփոխություն անել, խիստ անհրաժեշտության դեպքում հանրաքվեով»:
Նա ասաց, որ առայժմ միայն բանավոր հայտարարություններ կան, երբ կլինի գրավոր փաստաթուղթ, քաղաքական որոշում կկայացնեն:
Մեր հարցին՝ Նիկոլ Փաշինյանը խոսեց այդ ռիսկի մասին, ՀՀԿ-ն ունեցե՞լ է նման մտադրություն «տակից» ինչ-որ բան անելու եւ իր վարչապետին նշանակելու՝ Վահրամ Բաղդասարյանը պատասխանեց. «Ընդհանուր առմամբ քաղաքական դաշտում քայլերը միշտ ունենում են որոշակի ռիսկայնություն: Իսկ արդյոք ռիսկային չէ՞ր այն քայլը, որ նա կատարեց այդ շարժումը, դա ավելի ռիսկային էր: Եվ ընդհանրապես արդյունքի հասնելու համար պետք է ռիսկայնությունից չխուսափել»:
Լրագրողները ճշտեցին՝ այսինքն, չե՞ք բացառում, որ եթե սահմանադրությունը չփոփոխվի, ՀՀԿ-ն նման քայլի կգնա, Վահրամ Բաղդասարյանը պատասխանեց. «Մենք նման որոշում չունենք եւ նման մտադրություն չունենք, եւ ինձ թվում է` իմաստ էլ չունի Նիկոլ Փաշինյանի հրաժարականը: Աշխատում է, պետք է հնարավորություն ունենա իր աշխատանքով ցույց տա ամեն ինչ: Երբ որ լինի խանգարող հանգամանք, կարելի է դրա մասին մտածել, առայժմ խանգարող հանգամանք չկա: Մենք աջակցում ենք այս կառավարության բոլոր դրական ծրագրերին ու նախաձեռնություններին եւ պետք է աջակցենք»:
Մեր հարցին՝ չե՞ք կարծում, որ խոսքը զուտ ԱԺ-կառավարություն բնականոն աշխատանքի մասին չէ, խոսքը նրա մասին է, որ ովքեր հեղափոխություն են արել, գտնում են, որ այս ԱԺ-ն չի արտացոլում ժողովրդի ընտրության պատկերը, այսինքն, ընտրությունները կեղծվել են, հետեւաբար պետք է փոխվի այս ԱԺ-ի կազմը, խոսքը նրա մասին չէ, որ դուք կոճակը նորմալ կսեղմեք, Վահրամ Բաղդասարյանը պատասխանեց. «Այսինքն, իշխանափոխություն անողները ինչ առաջարկություն որ անեն, մենք պետք է ԱԺ-ն ենթարկվի՞: Որոշումները պետք է կայացվեն ԱԺ-ում: Եթե կլինեն հիմնավոր առաջարկներ, մենք այդ առաջարկները կքննարկենք, մեր որոշումները կկայացնենք»:
Հռիփսիմե ՋԵԲԵՋՅԱՆ
