Այսօր ԱԺ-ում լրագրողները ՀՀԿ խմբակցության ղեկավար Վահրամ Բաղդասարյանին հարցրեցին՝ տեղեկություններ ունե՞ք ՀՔԾ-ն Սերժ Սարգսյանին Մարտի 1-ի գործով հարցաքննության հրավիրե՞լ է, խոսե՞լ եք իր հետ: Վահրամ Բաղդասարյանը պատասխանեց. «Ինչքան որ դուք տեղեկություն ունեք մամուլից, այդքան տեղեկություն էլ մենք ունենք: Եթե պաշտոնական քայլ լինի, կիմանաք»:
Հարցին՝ տեղեկություններ կան այն մասին, որ նա պատրաստվում է Հայաստանը լքել ընտանիքով, կա՞ նման բան, թե՞ ոչ, պարոն Բաղդասարյանը պատասխանեց. «Դա ֆանտաստիկայի ժանրից է»:
Հարցին՝ գործող իշխանության հետ համագործակցության եզրեր տեսնո՞ւմ եք, Վահրամ Բաղդասարյանը վստահեցրեց, որ հիմա էլ լավ համագործակցում են, եթե չհամագործակցեին` ԱԺ-կառավարություն այսքան բնականոն աշխատանք չէր լինի:
Նա ասաց, որ ցանկացած կարեւոր հարցերի շուրջ էլ պատրաստ են բանակցել:
Հարցին՝ երբ նոր Սահմանադրություն էր ընդունվում, գնահատականներ էին հնչում, որ դա կարվում է Սերժ Սարգսյանի հագով, ընդ որում, սուպերվարչապետական սահմանադրություն էր կարվում, հիմա, փաստորեն, այն ստացվեց Նիկոլ Փաշինյանի հագով, չե՞ք զղջում, որ նման սահմանադրություն եք կարել, Վահրամ Բաղդասարյանն արձագանքեց կարճ. «Բարով մաշի»:
Բաղդասարյանը հիշեցրեց, որ Նիկոլ Փաշինյանը խոստացել է, որ ինքը լիազորությունների բաշխում պետք է անի՝ ե՛ւ ԱԺ-ի, ե՛ւ ՀՀ նախագահի, բայց առայժմ նման առաջարկ չեն լսել:
Հռիփսիմե ՋԵԲԵՋՅԱՆ
