Այսօր կառավարությունը ԱԺ արտահերթ նիստ է հրավիրել՝ Սեւանա լճի էկոհամակարգի պահպանման տարեկան միջոցառումների ծրագիրը հաստատելու մասին: Նիստի մեկնարկին «Ծառուկյան» խմբակցության պատգամավոր Վարդան Բոստանջյանի փոխարեն պատգամավորական մանդատը պաշտոնապես ստացավ եւ հրապարակային երդվեց Այծեմնիկ Օհանյանը: Հիշեցնենք, որ Բոստանջյանը մանդատը վայր էր դրել՝ պատճառաբանելով, թե հիվանդ է:
Ուշագրավ է,որ ՀՀԿ պատգամավոր Սամվել Ֆարմանյանը հանդես եկավ հայտարարությամբ՝ քրոջ հարցով: Նա ասաց. «Ցանկանում եմ անդրադառնալ ըստ էության իմ անձի շուրջ հարուցված քրեական գործին, որը վերաբերում է քրոջս, Գյումրիի պետական համալսարանին: Ակնհայտ է ինձ համար, որ սա առնչվում է ինձ՝ որպես պատգամավորի: Փաստաբանների կողմից համապարփակ տեղեկատվություն է ներկայացվել, որը եւս մեկ անգամ ապացուցում է, որ քրեադատավարական օրենքների կոպտագույն խախտումով անհիմն շինծու գործ է, մեղադրանք է առաջադրվել»:
Ֆարմանյանն ասաց, որ հանրապետության գրված ու չգրված օրենքների, բարոյականության սահմաններից այն կողմ, մարդկային պատշաճությունից էլ այն կողմ գործողություն է սա, որը չի կարող մնալ անպատասխան:
Ավելի ուշ «Ելք» խմբակցության պատգամավոր Ալեն Սիմոնյանը արձագանքեց՝ ասելով. «Քրգործեր հարուցվում են ըստ փաստերի, ոչ թե որեւիցե մեկի նախասիրությամբ»:
Հռիփսիմե ՋԵԲԵՋՅԱՆ
