«Հետաքրքրությունն ուղղված էր հարցին, թե արդյոք նա կարտասանի «ցեղասպանություն» բառը: Շատերը մտածում էին, որ երկու տարի առաջ Գերմանիայի Բունդեսթագի կայացրած որոշումը, որով քրեականացվում է Հայոց Ցեղասպանության ժխտումը, ենթադրում է, որ կանցլերը պաշտոնապես կհայտարարի այդ մասին, բայց դա չեղավ»,-«Հենարան» մամուլի ակումբում այսօր լրագրողների հետ հանդիպմանն անդրադառնալով Գերմանիայի կանցլեր Անգելա Մերկելի՝ Ծիծեռնակաբերդ այցելությանը, ասաց ՀՀ արտակարգ եւ լիազոր դեսպան Արման Նավասարդյանը: Նրա խոսքով՝ Մերկելի կողմից «ցեղասպանություն» բառը չարտասանելը մեզ համար ավելի շատ դրական նշանակություն ունի ներկայիս քաղաքական իրադրությունում, քան արտասանելը:
Դիրքորոշումը դիվանագետն այսպես է բացատրում. «Մերկելի այցը Հայոց ցեղասպանության զոհերի թանգարան եւ հուշահամալիր փաստում է եղեռնի՝ կայացած լինելը, թեեւ կանցլերն այդ բառը չի արտասանել: Եթե արտասաներ, ի՞նչ կտար դա մեզ: Նախ, Գերմանիան Թուրքիայի հետ կարեւոր հարաբերություններ ունի մի շարք ոլորտներում, իսկ այս տարի կայանալու է Էրդողանի այցը Գերմանիա: Թուրքիայում անհամբեր սպասում էին՝ արդյո՞ք ՀՀ-ում Մերկելը կարտաբերի այդ բառը: Իմ համոզմամբ՝ այդ բառն արտասանելն առաջնային համարելը երկկողմ հարաբերություններում չի աշխատում մեր օգտին: Ավելի լավ է չարտասանել, բայց փոխարենը՝ ունենալ հաջողություններ երկկողմ եւ միջազգային հարաբերություններում»:
Արման Նավասարդյանը հիշեցրեց, որ եվրոպական պետությունների ցանկում Գերմանիան առաջատարն է՝ ի տարբերություն Ֆրանսիայի, որի առաջնորդը ՀՀ-ի հետ սառը հարաբերություններ ունի. «Ինչպես Մերկելը նշեց, իր երկիրը կնպաստի Եվրոպա-ՀՀ հարաբերությունների զարգացմանը: Այս տեսանկյունից նրա այցը շատ կարեւոր էր»:
https://www.facebook.com/aravot.am/videos/1802029459912736/
Լուիզա ՍՈՒՔԻԱՍՅԱՆ
