Արմեն Գյոզալյան. «Օլիմպիական խաղերի ուղեգիր նվաճելը մեր գլխավոր նպատակներից մեկն է»

Հայաստանի առաջատար հեծանվորդ Էդգար Ստեփանյանը Շվեյցարիայում անցկացված մինչեւ 23 տարեկանների Եվրոպայի առաջնության 40 կմ խմբային վազք միավորներով մրցաձեւում վաստակեց 98 միավոր եւ նվաճեց չեմպիոնի կոչումը: Էդգարը մինչ այդ արդեն Հունաստանում չեմպիոն դարձել էր, բայց սկրեչ մրցաձեւից ու երիտասարդների մեջ:

Aravot.am-ը այս հաղթանակից հետո զրուցեց ազգային հավաքականի գլխավոր մարզիչ Արմեն Գյոզալյանի հետ:

-Շնորհավորում ենք Էդգար Ստեփանյանի նոր նվաճման առթիվ: Էդգարը հանդես եկավ նաեւ այլ դիսցիպլիններում: Նրա ընդհանուր մասնակցությունն ինչպե՞ս եք գնահատում:

-Էդգարը սկզբում հանդես եկավ 4 կմ հետապնդումով վազքին եւ ցույց տվեց 4.23.806 արդյունք՝ զբաղեցնելով 11-րդ տեղը, որը Հայաստանի հեծանվասպորտի պատմության լավագույն արդյունքն է: Ճիշտ է, մեդալ չեղավ ու այդ արդյունքի մասին քիչ գրվեց, սակայն այս տարի Եվրոպայի անցած տարվա առաջնության համեմատ Էդգարն իր արդյունքը գերազանցեց ամբողջ ինը վայրկյանով: Հեծանվասպորտում այդպիսի բան հաճախ չի լինում: Երկրորդ մրցաձեւը սկրեչն էր: Սկսեցինք կիսաեզրափակչից եւ 8-րդ տեղով անցանք եզրափակիչ, որտեղ նույն օրը երեկոյան 18 ուժեղագույնների մեջ զբաղեցրինք 12-րդ տեղը: Վերջինը 40 կմ միավորներով խմբային վազքի եզրափակիչն էր, որին մասնակցեց 20 հեծանվորդ, որտեղ էլ Էդգարը 98 միավորով նվաճեց չեմպիոնի տիտղոսը:

-Տոկիոյի օլիմպիական խաղերին երկու տարի է մնում: Վարկանիշ նվաճելու պլաններ կա՞ն:

-Օլիմպիական ուղեգիր նվաճելը մեր ֆեդերացիայի գլխավոր նպատակներից մեկն է: Դրա համար մասնակցում ենք այսպիսի բարձրակարգ մրցումներին ու աշխատում թանկագին միավորներ վաստակել:

2018 թվականի սկզբից սկսած անհատ մարզիկների բոլոր միավորները գումարվում են, որից հետո որոշվում է՝ ով օլիմպիական խաղերի վարկանիշ կունենա: Ուղեգիր վաստակում են 24 ուժեղագույնները: Ընդ որում, հեծանվային սպորտում միավորների հաշվարկման սանդղակ չկա: Այնպես չէ, որ մարզիկը պետք է վաստակի իքս քանակության միավոր եւ օլիմպիական խաղերին մասնակցելու իրավունք կստանա: Էդգարը մինչեւ Եվրոպայի այս առաջնությունը 26-րդն էր: 200 միավորը նրան պետք է որ վեր բարձրացրած լինի: Բայց սպասենք միջազգային ֆեդերացիայի պաշտոնական վարկանիշային նոր ցուցակին:

Աստծուց առաջ չընկնենք, բայց մեզանից կախված ամեն ինչ անում ենք: Մասնակցելու ենք մյուս մրցաշարերին եւս եւ աշխատելու ենք հնարավորինս շատ միավոր վաստակել:

-Ինչ մրցումների մասին է խոսքը:

-Դեռ տարեսկզբից ֆեդերացիայի նախագահ Արման Սահակյանի հետ որոշել ենք, որ բոլոր կարեւոր մրցումներին, որոնք շատ միավորներ են տալիս, պետք է մասնակցենք: Այս տարի սեպտեմբերին Կմեկնենք Օմսկ, հոկտեմբերին՝ Պորտուգալիա, հետո Ֆրանսիա՝ աշխարհի գավաթի փուլ: Եկող տարի էլ կարեւոր մեկնարկների պետք է մասնակցենք:

Աշոտ ՀԱԿՈԲՅԱՆ