Գերմանիան կանի իրենից կախված հնարավորը`որպեսզի ԵՄ-ի հետ Հայաստանի վիզաների ազատականացման ռեժիմը արագ գործողության մեջ մտնի: Այսօր, այդ մասին ՀՀ վարչապետ Նիկոլ Փաշինյանի հետ համատեղ ասուլիսում հայտարարեց Գերմանիայի Դաշնային Հանրապետության կանցլեր Անգելա Մերկելը։
ԵՄ երկրների եւ Հայաստանի միջեւ վիզային ռեժիմի մասին հարց հնչեցրել էր հայ լրագրողը:
Հայաստանի վարչապետ Նիկոլ Փաշինյանն էլ հավելեց, որ տիկին կանցլերի հետ բանակցությունների ժամանակ այդ հարցին անդրադարձ եղել է: Երկու երկրների ղեկավարները արձանագրել են, որ Հայաստանում վերջին քաղաքական փոփոխություններից հետո, վիճակագրության համաձայն, ներգաղթը գերազանցում է արտագաղթին: Սա, ՀՀ վարչապետի ներկայացմամբ, նշանակում է, որ մեր երկրում տեղի ունեցած ն փոփոխությունները, ըստ էության, խրախուսում են հայրենադարձությունը, ոչ թե արտագաղթը: Սա էլ, իր հերթին հույս է ներշնչում, որ վիզային ռեժիմի փոփոխությամբ պայմանավորված մտավախությունները չեզոքանում են:
Մինչ այդ, տիկին կանցլերը դրական էր որակել հայ-գերմանական հարաբերությունները` նկատելով, որ դրանք կարող են ավելի լավը լինել: Նա դրական արտահայտվեց ՀՀ-ի եւ ԵՄ-ի միջեւ ստորագրված շրջանակային համաձայնագրի համար: Խոստացավ, որ Գերմանիան իր ներդրումը կունենա համաձայնագրի իրագործման մեջ: Ասաց`պատրաստ են նաեւ պատասխանատվություն ստանձնել`Արցախի հարցի խաղաղ կարգավորման շրջանակներում: Այդ մասին խոսել են ՀՀ վարչապետի հետ:
Տիկին կանցլերն ասաց, որ հետեւել են Հայաստանում տեղի ունեցող քաղաքական փոփոխություններին`«թավշյա հեղափոխությանը, ինչպես ընդունված է այն անվանել»:
Նաև ասաց, որ ուրախ է գտնվել Հայաստանում`ոչ միայն մեր առաջին հանրապետության հարյուրամյա միջոցառումների շրջանակներում, այլ տեղի ունեցող այս կարեւորագույն քաղաքական փոփոխությունների ժամանակ:
Անգելա Մերկելն իր այցի շրջանակներում եղել է նաեւ Ծիծեռնակաբերդի հուշահամալիրում: Ասաց. «Գիտակցում ենք, թե 1915 թվականի ինչ սարսափելի իրադարձություն է տեղի ունեցել հայ ժողովրդի նկատմամբ: Դա չպետք է մոռացվի»:
Նելլի ԳՐԻԳՈՐՅԱՆ
