Կառավարությունը նախատեսում է հարկային բեռի թեթեւացում: Այսօր «Արմենպրես» մամուլի սրահում լրագրողները ՊԵԿ նախագահի առաջին տեղակալ Ռաֆիկ Մաշադյանից հետաքրքրվեցին՝ դրանից բյուջետային ի՞նչ չափի կորուստներ կունենանք:
Մաշադյանը պատասխանեց, որ քննարկվում է եկամտահարկի դրույքաչափի փոփոխության հարցը. «Օրակարգում ունենք տարբեր դիրքորոշումներ, բայց հիմնականում քննարկվում է եկամտային հարկի դրույքաչափը սահմանել շահութահարկի դրույքաչափին հավասար, այսինքն՝ 20 տոկոս: Կարծում եմ, փոփոխությունը հնարավոր կլինի 2019-ի հունվարի 1-ից: Դրա արդյունքում, իհարկե, կունենանք հարկային եկամուտների կորուստներ՝ 60-70 մլրդ դրամի շրջանակներում, կարծում եմ, դա կփոխհատուցվի հարկ վճարողների կողմից աշխատավարձի իրական մեծությունները հայտարարագրմամբ, չգրանցված աշխատողների բացահայտման, ստվերի կրճատման արդյունքում»:
Հնարավոր է մինչեւ 300 հազար դրամ աշխատավարձի դեպքում եկամտահարկը լինի 20 տոկոս, դրանից բարձրի դեպքում՝ 25 տոկոս, վերջնական քննարկումների արդյունքում կորոշեն, կներկայացվի ԱԺ:
ՊԵԿ փոխնախագահն ասաց, որ նաեւ քննարկվում է միկրոբիզնեսին հարկերից ազատելու վերաբերյալ թեզը. «Նախ, այսօր մեր հարկային օրենսգրքում ունենք հարկման 5 ռեժիմներ, ուզում ենք կրճատել հարկման ռեժիմները, 3 ռեժիմ դարձնել: Այսինքն, լինի գերփոքրբիզնես, որի մեջ կներգրավեն որոշակի շեմ ունեցող կազմակերպությունները, եւ քննարկվում է տարբերակ, որ մինչեւ այդ շեմը ընդհանրապես հարկերից ազատվի: Բայց դեռեւս չեմ կարող ասել, թե որն է այդ շեմը եւ ովքեր են այդ դաշտում գործելու»:
Հռիփսիմե ՋԵԲԵՋՅԱՆ
