«Հասկանալի է, որ խաղի կանոնները փոփոխման ենթակա չեն, բայց որքան էլ շուտ փոփոխվի Ընտրական օրենսգիրքը, միեւնույն է սեպտեմբերի 23-ին դրանք ուժի մեջ չեն մտնելու, այդ պատճառով ինչ-որ տեղ առաջ գցվեցին այս փոփոխությունները»,- այսօր, ՀՀ վարչապետին առընթեր ընտրական օրենսդրության բարեփոխումների հանձնաժողովի կազմակերպած Քրեական դատավարության եւ վարչական իրավախախտումների վերաբերյալ օրենսգրքի փոփոխությունների փաթեթի վերաբերյալ հանրային քննարկման ժամանակ, առաջարկվող փոփոխություններն այսպես հիմնավորեց հանձնաժողովի քարտուղար Դանիել Իոաննիսյանը: Այս փոփոխություններն, ըստ էության, պայմանավորված են Երեւանի ավագանու ընտրություններով: Իսկ փոփոխությունները վերաբերվում են կրկնաքվեարկությունների դեպքերին, ընտրակաշառքներին եւ ընտրական շրջանում բարեգործությանը:
Ըստ Դանիել Իոաննիսյանի, կրկնաքվեարկության վերաբերյալ անհրաժեշտ են տարբեր մոտեցումներ. «Օրինակ, երբ որեւէ գյուղում ամուսինը կնոջ անձնագրով գալիս է եւ ցանկանում է քվեարկել նրա փոխարեն, կամ ընտանիքի այլ անդամի փոխարեն, դա թեեւ կրկնաքվեարկության փորձ է, սակայն այլ իրավիճակ է, ասենք նրանից, երբ կազմակերպված խումբն է փորձում իրականացնել կրկնաքվեարկություն»:
Ընտրակաշառքների եւ ընտրական շրջանում բարեգործության մասով, հստակեցվել են այդ գործողությունների որակումները եւ խստացվել են պատիժները`վարչականից քրեականի փոխելով: Այսուհետ, ի դեպ, ընտրակաշառք խնդրելը եւս քրեորեն կպատժվի: Իսկ այն դեպքում, երբ ընտրակաշառք ստացողը իր արարքից ոչ ուշ, քան հնգօրյա ժամկետում կդիմի իրավապահներին եւ կօժանդակի հանցագործության բացահայտմանը, ինքը կազատվի պատասխանատվությունից:
Հանձնաժողովն ընտրատեղամասերում կարգ ու կանոն հաստատելու առաջարկներ էլ է արել, որպեսզի ով ցանկանա, չկարողանա տեղամասում գտնվել. «Առաջարկվում է սկզբունքուրեն նոր լուծում, դա այն է, որ թեկնածուները, դաշինքները, դիտորդները, այլ կազմակերպությունները իրավունք ունենան վարչական իրավախախտում նկատելու դեպքում միանգամից դիմել դատարան: Այս նորմը ոչ միայն պարզեցնում է գործող կարգերը եւ ավելի քիչ հանրային ռեսուրսներ ծախսելով պատասխանատվության կանչել իրավախախտումներ իրագործածին, այլ դիտորդական կազմակերպություններին հնարավորություն է տալիս ավելի անմիջականորեն մասնակցել օրինականության հսկմանը»:
Այլ մանրամասները`տեսանյութում
Դիտավորությամբ բաց քվեարկողները եւս քրեական պատասխանատվության կենթարկվեն:
Քննարկմանը ներկա փաստաբան Արայիկ Պապիկյանը դեմ է այս փոփոխություններին: Ասում է ոչ թե պետք է գնանք ընտրախախտումների պատիժները խստացնելով եւ իրավապահներին ավելի լայն հնարավորություններ տալով, այլ հասարակության իրավագիտակցությունը փոխելու ճանապարհով: Ինքն ուզում է հավատալ, որ առաջիկա ընտրություններում նախորդների պատկերը չի կրկնվի եւ քրեական գործեր չեն լինի միայն հաղթանակ տարած իշխող ուժի դեմ:
Այլ մանրամասները`տեսանյութում
Այս մտահոգությունները կիսում է նաեւ «Թրանսփերենսի ինթերնեյշնլ» հակակոռուպցիոն կազմակերպության ներկայացուցիչ Հերիքնազ Տիգրանյանը: Նա կողմ է նաեւ, որ ընտրակաշառք ստացողին էլ պատժելուն:
Նելլի ԳՐԻԳՈՐՅԱՆ
