Սեւանա լճից հավելյալ ջրառը ոռոգման խնդրի լուծման միակ տարբերակն է: Այսօր այս մասին կառավարության նիստից հետո լրագրողների հետ ճեպազրույցում ասաց գյուղատնտեսության նախարար Արթուր Խաչատրյանը:
Այսօր կառավարությունը հաստատեց Սեւանա լճից այս տարվա համար ջրի բացթողնման չափաքանակ սահմանել մինչեւ 210 միլիոն խ/մ, հավելյալ ջրառը կազմելու է մինչեւ 40 միլիոն խ/մ:
Օգոստոսի 6-ին վարչապետի մոտ խորհրդակցության ժամանակ Փաշինյանն ասել էր՝ «Ընդհանրապես, Սեւանա լճի այսօրվա իրավիճակը մեզ ստիպում է արձանագրել, որ պետք է դադարենք Սեւանին վերաբերվել որպես խաղալիք կամ ջրի տարա: Դա բացարձակապես անթույլատրելի է, եւ Սեւանին որպես ջրի տարա վերաբերվելու գործելակերպը, ցավոք, արդեն երկար ժամանակ Հայաստանում վերածվել է պետական քաղաքականության, ու դրա հետեւանքները մենք այսօր տեսնում ենք: Հույս ունեմ, որ ներկաները հենց այս տրամադրությամբ եւ տրամադրվածությամբ են եկել այսօրվա քննարկմանը: Մենք պետք է այս փակ ու անցանկալի շղթան ի վերջո ճեղքենք»:
Նախկին իշխանությունների օրոք, երբ որոշվեց Սեւանից 170 միլիոն խ/մ ջուր պետք է բացթողնվի, մասնագետները դա անթույլատրելի էին համարում, հիմա նոր կառավարությունն ավելի շատ ջրառ է նախատեսում:
Այս առնչությամբ պատասխանելով Aravot.am-ի հարցին, Խաչատրյանն ասաց, որ նախորդ տարի բաց է թողնվել հավելյալ 100 միլիոն խ/մ, իսկ այս տարի նախատեսվում է մինչեւ 40 միլիոն խ/մ: Նախարարը վստահեցրեց՝ այլ ելք չունեին, գյուղացիներն ամբողջ տարի աշխատել էին, եւ սպասում էին ոռոգման. «Սա վերջին ջուրը պետք է լինի, որպեսզի բերքը չկորի»:
Նախարարն ասաց, որ տարբերակներ են մշակվում, որպեսզի մեխանիզմներ մշակվեն մեր գյուղատնտեսությանը վերադարձնելու համար Հայաստանի ջրերը, որոնք գնում լցվում են Կասպից ծովը.«Արաքս գետը գնում է ոչ շատ բարեկամ երկրներ՝ Թուրքիա, Նախիջեւան, մեխանիզմներ ենք մշակելու ջուրը վերադարձնելու, որը էապես կնվազեցնի ճնշումը Սեւանի վրա»:
Ստվերային գյուղատնտեսության մասին էլ ասաց, որ եղել են բանջաբոստանային տարածքներ, հետո վերածել են այգիների ու համապատասխան փաստաթղթային փոփոխություններ չեն արել. «Այսինքն հողի հարկի վրա դա չի ազդել»:
Ըստ գյուղատնտեսության նախարարի` դրանք կարող էին լինել եւ շարքային գյուղացիները, եւ ավելի մեծ հողատարածքներ ունեցող սուբյեկտները. «Օրինակ՝ գնում ենք Եղվարդ, փաստաթղթում նշված է` ցորենի արտ, գնում ենք տեսնում ենք այդտեղ «հայթեք» լավագույն այգի է»:
Նախարարն ասաց, որ սկսելու են ուսումնասիրություններ՝ որ տարածքում ինչ մշակաբույսեր կան, եւ դա համեմատելու են կադաստրի տեղեկությունների հետ:
Նելլի ԲԱԲԱՅԱՆ
