Այսօր Հիմնադիր խորհրդարանի քարտուղարության համակարգող Ժիրայր Սեֆիլյանն ու «Սասնա ծռեր» խմբավորման խոսնակ Վարուժան Ավետիսյանը հայտարարեցին նոր կուսակցություն ստեղծելու մասին: Նրանք ասացին, որ առաջիկա ԱԺ ընտրություններին են մասնակցելու:
Ժիրայր Սեֆիլյանն ասաց, որ ինչքան էլ Նիկոլ Փաշինյանն ասում է ՝ ամեն ինչ լավ է, իրականում գիտենք, թե ինչպիսի ժառանգություն ենք ստացել նախորդներից, համարյա սնանկ պետություն ենք ստացել. «Նիկոլ Փաշինյանը ծանր բեռ է վերցրել ու այդ բեռը չի կարող բարձրացնել՝ առանց հենվելու ազգի ռեսուրսի վրա: Որեւէ ուժ էլ, եթե վերցներ այն պատասխանատվությունը, որը Փաշինյանը վերցրել էր, նույն ձեւ պիտի աներ»:
Վարուժան Ավետիսյանն ասաց, որ դեռ «Սասնա ծռերից» Արմեն Բիլյանը, Սմբատ Բարսեղյանը, Պավլիկ Մանուկյանը անազատության մեջ են: Նա ասաց. «Ապստամբության իրավունքը բացառիկ իրավունք է, ապստամբները կարող են պատասխանատվության ենթարկվել միայն բացառիկ դեպքերում, երբ կշեռքի նժարին է դրված անդառնալի բարձրագույն արժեքը, այսինքն՝ մարդու կյանքը, այն պարագայում, եթե այդ կյանքը խլվել է մարդասիրական իրավունքի խախտմամբ: Պետք է միայն քննության առարկա լինեն մահվան դեպքով ելքերը, նախ պետք է պարզվի վերաբերելիությունը «Սասնա ծռեր» խմբավորման անդամներին, արդյո՞ք նրանք են կատարել այնպիսի գործողություններ, որոնք հանգեցրել են երեք ոստիկանների մահվան, ու եթե որեւէ մեկի մասով դա ապացուցվի, ապա պատասխանատվության հարցը պետք է նաեւ դիտարկվի մարդասիրական իրավունքի տեսակետից: Ապստամբությունը զինված հակամարտություն է, եթե ապստամբները չեն խախտել զինված հակամարտության կամ մարդասիրական իրավունքը, ապա նրանք անպարտ են օրենքի առաջ»:
Aravot.am-ի հարցին՝ մարդասպանությունը մարդասիրական իրավունքի տեսակետից ինչպե՞ս կարելի է դիտարկել, մարդասպանությունը ի՞նչ մարդասիրություն, Վարուժան Ավետիսյանը պատասխանեց. «Ասացի, որ եթե տեղի է ունեցել մահվան ելքով դեպք, եւ այդ դեպքը հետեւանք չէ մարդասիրական իրավունքի խախտման, դա պատերազմի իրավունքն է, ապստամբությունը զինված հակամարտություն է, եթե նրանք գերիների հետ վատ չեն վարվում, անզեն մարդու չեն տանջում, չեն ստորացնում, սոված չեն պահում, տվյալ կողմից մարդասիրական իրավունքի խախտում ուրեմն չկա: Մենք մարդասիրական իրավունքի խախտում թույլ չենք տվել»:
Մեր հարցին՝ դա սպանված ոստիկանների որբացած երեխաներին ինչպե՞ս կարող եք բացատրել, Վարուժան Ավետիսյանը պատասխանեց. «Դուք բարոյական հարթության մեջ եք մտնում, ես՝ իրավական: Մարտի 1-ի հարյուր հազարավոր մարդիկ էլ են որբ մնացել, հարյուր հազարավոր մարդիկ բռնագաղթվել են երկրից, քառօրյա պատերազմի ժամանակ հարյուրից ավելի երիտասարդներ, որոնց մի մասը տանջամահ են արվել հակառակորդի ձեռքով: Այդ բոլորի մեղավորը այն ժամանակվա ռեժիմն էր, որի արթուն պահապանն էր այն ժամանակ ոստիկանությունը, որն ուղղակի ենիչերիական հրոսակախումբ էր: Կապ չունի` իրենք հանցագործներ էին ի պաշտոնե, բոլոր դեպքերում զինված հակամարտությունների իրավունքը պետք է գործի: Մենք այդ իրավունքը չենք խախտել: Եթե նա դարձել է զինված պահապանը ժողովրդի իշխանության յուրացման, պետությունը զավթելու, ապա նրա նկատմամբ քաղաքացին իրավունք ունի կիրառել բռնի ուժ: Տվյալ պարագայում քաղաքացին է դառնում ոստիկան, վերցնում է նրա լիազորությունը, անմիջական կառավարում է իրականացնում: Ես բոլորին հորդորում եմ մտածել իրավական կատեգորիաներով»:
Մեր հարցին՝ իսկ եթե բարոյական հարթության մեջ նայե՞ք, Վարուժան Ավետիսյանը պատասխանեց. «Այդ երեխաները մեղք են, բոլորը ողբում են, մենք էլ ենք ցավում, որ մարդիկ մոլորված են եղել, ծառայել են բռնապետական ռեժիմին եւ ստիպված ենք եղել ուժի դիմել: Մենք չենք գնացել մարդ սպանելու, մենք նպատակ ենք ունեցել ամեն կերպ զերծ մնալ վնասվածք հասցնելուց, առավել եւս՝ մահացու, բայց որեւէ երաշխիք չկա: Ասենք, մենք ունեինք տանկեր, դրանով էինք ապստամբում, դա մեր որոշումն էր, կարող էին հարյուրավոր մարդիկ զոհվել: Մենք բարոյականությունը չենք մերժում, բայց իրավունքի կատեգորիաներով մտածենք: Մեր եւ մեր ժողովրդի ընդհանուր ցավն է ոստիկանների մահը, նաեւ երկուսի մահվան հետ կապ չունենք, դա վերագրվում է մեզ, այնուամենայնիվ, մարդիկ են զոհվել, ամեն ինչ կտայինք, որ դա չլիներ»:
Հռիփսիմե ՋԵԲԵՋՅԱՆ
