Պետական եկամուտների նախագահ Դավիթ Անանյանն այսօր կառավարության նիստից հետո լրագրողների հետ զրույցում վստահեցրեց՝ բացի «Երեւան սիթի» սուպերմարկետների ցանցից ստուգումներ են իրականացվում նաեւ այլ սուպերմարկետներում:
Անանյանը նաեւ հերքեց, թե՝ «Երեւան սիթիում» շարունակում են գյուղմթերքները վաճառել նախորդ իշխանությունների հետ ձեռքբերված պայմանավորվածությամբ՝ առանձին Ա/Ձ-ներով. «Չկա այդպիսի բան, այդպիսի բան չի կարող լինել»:
Այսօր կառավարության նիստում վարչապետն ասել էր, որ ՀՀ-ում ստվերային գյուղատնտեսություն կա: ՊԵԿ նախագահն այս առնչությամբ ասաց, որ սկսել են ոլորտային ստվերի գնահատման աշխատանքները, եւ աշխատանքային խումբն առաջին անգամ նման գնահատական պետք է տա.«Հիմա մենք մեթոդաբանությունն ենք քննարկում՝ ինչպիսի մեթոդաբանությամբ պետք է ոլորտային ստվերը գնահատենք: Մեթոդաբանությունից հետո պետք է որոշվեն տեղեկատվական աղբյուրները: Հետո տեղեկատվությունը ստացվի, մշակվի, որից հետո ուրվագծեր կնշմարվեն»:
Գյուղատնտեսությունն էլ, ինչպես ասաց Անանյանը, ազգային հաշիվների 20 գործունեության տեսակներից մեկն է, որի ստվերն էլ պետք է գնահատվի:
Նելլի ԲԱԲԱՅԱՆ
