«Բավականին մեծ եկամուտներ ենք ծրագրում 2019 թվականին, եւ հետեւաբար, մենք պետք է լինենք հաշվենկատ եւ հավասարակշռված»-այսօր կառավարության նիստից հետո լրագրողների հետ ճեպազրույցում ասաց պետական եկամուտների կոմիտեի նախագահ Դավիթ Անանյանը:
Նա ներկայացրեց Հարկային օրենսգրքում արվող որոշ փոփոխություններ, որոնց երեք հիմնական ուղղություններն են. «1-ին ուղղությունն այլընտրանքային հարկային համակարգերի կրճատումն է: 2-րդը՝ շրջանառության հարկի շեմի վերաբերյալ որոշման կայացում, 3-րդը՝ եկամտի եւ կապիտալի հարկման բեռի նվազեցում սպառման հարկման բեռի ավելացման միջոցով: Սրանք ընդհանուր ուղղություններն են, սակայն ունեն նաեւ ենթաուղղություններ, որոնց վերաբերյալ սեպտեմբերին կունենանք կառավարության կողմից ձեւավորված վերջնական տեսլական»:
Հարցին՝ կառավարությունը հարկային բեռի նկատելի թեթեւացո՞ւմ է նախատեսում, Անանյանը պատասխանեց. «Մենք կարող ենք ասել, որ կառավարությունը բիզնեսին աջակցող փոփոխություններով գնալու է Ազգային ժողով: Ավելի ճիշտ կլինի ասել, որ կունենանք հարկային բեռի փոփոխություն, որովհետեւ լինելու է կապիտալի եւ եկամուտների հարկման նվազեցում, սպառման հարկման բեռի ավելացման ճանապարհով»:
ՊԵԿ նախագահը վստահեցրեց՝ եկամտահարկի նվազեցման որոշման նախագիծը պատրաստ կլինի մոտ օրերս: Անանյանի խոսքերով՝ ՊԵԿ-ն այդ քննարկումներին մասնակցում է որպես պետական բյուջեի եկամուտներն ապահովող. «Մենք մասնակցում ենք որպես հարկահավաք, չէի ուզի մեր տեսանկյունից անդրադառնալ, որովհետեւ միասնական դիրքորոշում չկա, կան միասնական ուղենիշեր, սցենարներն են տարբեր: Բայց սեպտեմբերին կառավարությունում այդ հարցով կլինի միասնական դիրքորոշում:Այս տարի գնալու ենք փոփոխությունների, որոնք կլինեն ժամանակագրական»:
Անանյանը վստահեցրեց, որ փոփոխությունների արդյունքում ավելացված արժեքի հարկի դրույքաչափի բարձրացում չի նախատեսվում։
Նելլի ԲԱԲԱՅԱՆ
