Այրում քաղաքի Բարեկամության փողոցի 7-րդ շենքի բնակիչների պահանջով, երկու հրապարակումով անդրադարձել ենք այդ շենքի բակում չգործող կոյուղու, կոյուղաջրերի բաց հոսքի, հակասանիտարական վիճակի խնդիրներին: Մեր առաջին հրապարակումից հետո հարցը ժամանակավորապես լուծվել է:
Այդ հրապարակումները արժանացել են Տավուշի մարզպետ Վահե Ղալումյանի ուշադրությանը: Տավուշի մարզպետարանի ինտերնետային կայքը հայտնում է , որ օգոստոսի 22-ին «Տավուշի մարզպետ Վահե Ղալումյանը աշխատանքային այց է կատարել Նոյեմբերյանի տարածաշրջանի Այրում համայնք, հանդիպել համայնքի ղեկավար Արայիկ Պարանյանի հետ, տեղում ուսումնասիրել եւ քննարկել Այրում քաղաքի Բարեկամության փողոցի 7-րդ շենքի կոյուղու խափանման, կոյուղաջրերի բաց հոսքի, հակասանիտարական վիճակի մասին հարցը, որի վերաբերյալ օգոստոսի 20-ի համարում «Այրում քաղաքում բնակիչները խեղդվում են կոյուղաջրերի գարշահոտից» վերտառությամբ հրապարակում էր տեղադրել aravot.am լրատվական կայքը: Քննարկմանը ներկա են եղել նաեւ մարզպետարանի պատասխանատուներ, «Վեոլիա ջուր» ՓԲԸ-ի «Արեւմուտք» մասնաճյուղի Ալավերդու տեղամասի պետ Արթուր Կոլոլյանը, շենքի բնակիչներ: Արթուր Կոլոլյանը մարզպետին տեղեկացրել է, որ խնդիրը ներկայումս ժամանակավորապես լուծվել է եւ պարտավորվել է, որ առաջիկա 10-15 օրվա ընթացքում լավ չաշխատող դիտահորերի վերակառուցմամբ հարցին վերջնական լուծում կտրվի»:
Լուսանկարը`Տավուշի մարզպետարանի ինտերնետային կայքից
Ոսկան ՍԱՐԳՍՅԱՆ
