Ժողովրդագրական խնդիրների լուծմանն ուղղված` երկրորդ երեխայի ծնունդը խթանելու նպատակով, աշխատանքի եւ սոցիալական հարցերի նախարարությունը 2-րդ երեխային հատկացվող միանվագ նպաստը 50 հազար դրամից որոշել էր դարձնել 150 հազար դրամ: Այս նախագիծը ներկայացվել էր կառավարությանը, այն պետք է հուլիսի 1-ին հաստատվեր, սակայն հետաձգվեց:
Այս առնչությամբ այսօր աշխատանքի եւ սոցիալական հարցերի նախարար Մանե Թանդիլյանը` իր աշխատանքային գործունեության 100 օրվա կապակցությամբ լրագրողների հետ հանդիպման ժամանակ վստահեցրեց, որ խնդիրը ընթացակարգային է եղել, եւ նախատեսում են որոշումը հոկտեմբերի 1-ից ուժի մեջ մտցնել. «Գոնե այս փուլում ֆինանսական միջոցների խնդիր չկա, մեծ գումարների մասին չէ խոսքը, եւ ունենք նախարարության տարբեր միջոցներ, գումարներ, որոնցով հարցը կլուծվի: Ինձ համար էլ էին հայտնություն այդքան ընթացակարգերը, նախատեսում ենք հոկտեմբերի 1-ից ուժի մեջ մտցնել, ավելին՝ կքննարկենք նաեւ հետադարձ ուժ ունենալու հարցը»:
Նախարարի խոսքերով՝ նախագիծը կարեւոր է, որովհետեւ Հայաստանում ժողովրդագրական լուրջ խնդիր կա եւ պետք է ուշադրություն դարձնել ոչ միայն 3-4 երեխա ունենալուն, այլեւ պետք է կարեւորվի 2-րդ երեխան:
«Միջինում 1.7 երեխա է ծնվում Հայաստանի Հանրապետությունում: Եթե 2-րդ երեխան չծնվի, ապա լուրջ հետընթաց ենք ունենալու»: 2-րդ երեխայի համար 150 հազար դրամ նախատեսելն, ըստ նախարարի, «մեսիջ է», որով ասում են՝ 2-րդ երեխան մեր պետության համար ռազմավարական նշանակություն ունի. «Երբ մեր հայացքը միայն դեպի 3-4-րդ երեխան է լինում, ապա նվազեցվում է 1-ին եւ 2-րդ երեխայի նշանակությունը»:
Թանդիլյանի ներկայացմամբ, խնդիրը միայն գումար տրամադրելն ու դրա չափը չէ, կան այլ խնդիրներ էլ, ինչի պատճառով ընտանիքները 2-րդ երեխան չեն ունենում: Օրինակ՝ մանկապարտեզները:
Մանրամասները` տեսանյութում:
Նելլի ԲԱԲԱՅԱՆ
