«Հրապարակվել են պաշտոնական թվերը, որոնք գլոբալ առումով ոչինչ չեն ասում, քանի որ խաղողը մթերում ենք մեկ անգամ եւ գինին պատրաստում ենք մեկ անգամ, ուստի արտադրությունը կիսամյակով կարող է ընդամենը հուշել միտումների մասին: Անցյալ տարվա նույն կիսամյակի հետ համեմատած պատկերը հետեւյալն է՝ գինին ունենք մոտավորապես նույն՝ մինուս 1 տոկոս, կոնյակը՝ մինուս 12 տոկոս, օղին՝ մինուս 38 տոկոս…Վիսկիի պարագայում ունենք կտրուկ նվազում»,- օգոստոսի 22-ին, «Հայացք» ակումբում ամփոփելով խաղողագործության և գինեգործության վիճակը 2018թ-ի առաջին կիսամյակին՝ ասաց Գինու ազգային կենտրոնի նախագահ Ավագ Հարությունյանը:
Նրա ձեւակերպմամբ` գինու առումով շեշտակի աճ կա 2015-ից սկսած, այս տարի եւս աճ կլինի ոչ միայն լիտրերով, այլեւ արժեքով եւ խաղողի գնով:
Մանրամասները՝ տեսանյութում՝
Ավագ Հարությունյանը կանխատեսեց, որ առաջիկա 3 տարիներին կոնյակի նվազում կլինի՝ ինչպես արտադրության, այնպես էլ արտահանման առումով: Նրա ձեւակերպմամբ, պատճառները երկուսն են՝ ռուսական դաշտը խստացրել է որակի նկատմամբ պահանջները, եւ հեղափոխությունից հետո կտրուկ նվազել են կոռուպցիոն մեխանիզմները, կազմակերպությունների թիվը, շուկան մաքրվել է, եւ չկա այն հիմքը, որը թույլ կտա արտահանել կեղծ կոնյակ: Նա նաեւ ասաց, որ ռուսական շուկայում ու մեզանում օղու սպառումը գնալով նվազում է:
Մանրամասները՝ տեսանյութում՝
Ավագ Հարությունյանը գինու որակի մասին ասաց, որ անորակությունը հեռավոր անցյալում է. «Մեր որակով մրցունակ ենք: Եվ եթե առաջ մեզ համեմատում էինք ԱՊՀ կամ արեւելյան երկրների հետ, ապա այսօր համեմատում ենք եվրոպական լավագույն գինեգործական երկրների հետ եւ կարող ենք ամրագրել, որ որակի հետ կապված որեւէ խնդիր չունենք: Կոնյակի որակի կտրուկ անկում, գահավիժում ունեինք մինչեւ 1998 թվականը: Գահավիժում ունեցանք 2013 թվականից հետո, երբ ռուսական ռուբլին արժեզրկվեց, իսկ մեր պայմանագրերը ռուսական ռուբլով էին…»:
Գինու ազգային կենտրոնի նախագահ Ավագ Հարությունյանը հայտարարեց, որ հեղափոխությունը վերջին հարյուր տարվա ընթացքում մեզ տալիս է շանս, որպեսզի հրաժարվենք կեղծ արտադրանքից. «Վերջին անգամ մենք մաքուր եղել ենք 1913թ., երբ իմաստ չկար կեղծելու, եւ իրավական, եւ քաղաքական դաշտը թույլ էին տալիս լինել բացարձակ ազնիվ: 1914թ. սկսվեց Առաջին համաշխարհային պատերազմը, իսկ պատերազմը եւ կեղծարարությունը եղբայրներ են, հետո եղան վայրիվերումներ, կեղծարարություն, որը վերջացավ 1-2 ամիս առաջ»:
Մանրամասները՝ տեսանյութում՝
Գոհար ՀԱԿՈԲՅԱՆ
