«Առավել կարեւոր են կոնգրեսականների հետ հանդիպումները: ԱՄՆ կոնգրեսում մենք ունենք բարեկամ-կոնգրեսականներ, որոնք մեզ շատ են օգնում: Նրանց միջոցով ենք մենք ազդում Թրամփի աշխատակազմի վրա»,-«Հենարան» մամուլի ակումբում այսօր լրագրողների հետ հանդիպմանն անդրադառնալով հուլիսին ՀՀ փոխվարչապետ Արարատ Միրզոյանի ԱՄՆ կատարած այցին եւ կոնգրեսականների հետ հանդիպմանը, ասաց միջազգայնագետ Սուրեն Սարգսյանը:
«Սակայն հիմա իրավիճակն այնպիսին է, որ դեմոկրատ-կոնգրեսականները, մասնավորապես՝ Ադամ Շիֆը, Թրամփի մեծագույն թշնամիներից են: Վերոնշյալից բխում է, որ երբ կոնգրեսականները Փաշինյան-Թրամփ հնարավոր հանդիպման համար ստորագրահավաք են իրականացնում(սկսվել է հուլիսի 24-ին), իսկ Թրամփը տեսնում է, որ ստորագրողներն իր հիմնական մրցակից-կոնգրեսականներն են, նրա մոտ այլ վերաբերմունք է ձեւավորվում մեր հանդեպ: Պետք է հասկանալ, թե ում միջոցով եւ ինչպես Հայաստանը կարող է ԱՄՆ-ում ազդեցություն ձեռք բերել»,-նկատեց Սուրեն Սարգսյանը:
Ինչ վերաբերում է առաջիկայում Գերմանիայի կանցլեր Անգելա Մերկելի՝ ՀՀ սպասվելիք այցին, փորձագետը շեշտեց. «Դա ամենաբարձր մակարդակի այցն է Հայաստան: Որեւէ կանցլեր երբեւէ ՀՀ չի այցելել: Գերմանիան ՀՀ-ի կարեւոր դոնոր երկրներից է, եւ այդ համատեքստում հարցեր պետք է քննարկվեն: Այդ այցը նաեւ հնարավորություն է՝ Եվրամիության հետ ավելի խորը հարաբերություններ հաստատելու տեսանկյունից»:
Լուիզա ՍՈՒՔԻԱՍՅԱՆ
