Այսօր հրավիրած ասուլիսում արդարադատության նախարար Արտակ Զեյնալյանը հայտարարեց, որ Երեւանի ավագանու ընտրություններում «Հանրապետություն» եւ «Լուսավոր Հայաստան» կուսակցությունները մասնակցելու են դաշինքով. «Ես համաձայնություն եմ տվել գլխավորել «Հանրապետություն» կուսակցության եւ «Լուսավոր Հայաստան» նախընտրական դաշինքի ցուցակը: Ավագանու ընտրություններում երկու կուսակցությունները հանդես են գալու դաշինքով: Կներկայացնեմ արձակուրդ գնալու դիմում եւ արձակուրդում եղած պայմաններում կմասնակցել քարոզարշավի: Չեմ համատեղի նախարարի պաշտոնը թեկնածուի կարգավիճակի հետ»:
Նախարարն ասաց, որ դա երկու կուսակցությունների համատեղ քննարկումների արդյունքում կայացված որոշում է. «Կարծում ենք` Հայաստանի համար, Երեւանի համար դա օգտակար կլինի եւ պիտանի, որպեսզի այս երկու կուսակցությունները մասնակցեն ընտրություններին դաշինքով եւ մասնակցեն` ցուցակում իմ գլխավորությամբ»:
Թե ի՞նչ շանսեր ունեն` Զեյնալյանն ասաց, որ կախված է նրանից, թե մարդիկ ինչպես կքվեարկեն:
Դաշինքի անվանումը դեռ որոշված չէ, այն քննարկման փուլում է:
Ինչ վերաբերում է «Ելք» դաշինքին, Զեյնալյանն ասաց, որ «Ելք» դաշինքը կա, ներկայացված է ԱԺ-ում, ու այն գործելու է այնքան ժամանակ, քանի դեռ ԱԺ-ն չի ցրվել:
Հռիփսիմե ՋԵԲԵՋՅԱՆ
