Քիչ առաջ մամուլի ասուլիսի ընթացքում ՀՀ սփյուռքի նախարար Մխիթար Հայրապետյանը սկսեց քննադատել իր բնութագրմամբ «երկու-երեք» լրատվամիջոցների: Նա վրդովված է մամուլի որոշ հրապարակումների առիթով և հայտարարեց. «Ընդհուպ մինչև ընտանիքս սևացրել են ինձ, բայց որևէ կերպ չեմ արձագանքել, դատական գործընթացի մեջ չեմ մտել»:
Նախարարը վրդովված է, որ մամուլում գրվել է, թե սփյուռքի նախարարը պառակտում է ԱՄՆ-ի կամ Լոս Անջելեսի հայ համայնքը: Նա նաեւ ասաց, թե` թերթերից մեկը Ջավախքում իրեն ամեն կերպ սադրում էր, որ հակավրացական հայտարարություն աներ: Իր՝ ԱՄՆ այցի մասին նախարարն ասաց, թե հրապարակել են ամբողջ հանդիպումների ցանկը և վստահեցրեց, որ հավասարակշռված է աշխատել: Այնուհետև նշեց, թե նման հրապարակումներն են հենց պառակտում: Այս դրվագները ներկայացնելուց հետո Մխիթար Հայրապետյանը, դիմելով լրատվամիջոցներին, սկսեց քննադատել. «Երկու-երեք ԶԼՄ-ներ կան, որոնք սթափելու կարիք ունեն: Քննադատեք ինձ` ինչքան ուզում եք, նույնիսկ, երբ իմ հարազատներին են կպել, ես չեմ ուզել անձնավորել: Բայց կա պետության հարց, երբ դուք ձեր գործողություններով վնասում եք, ես թույլ չեմ տա, թող հանրությունը տեսնի ու իր գնահատականը տա, թե ձեր հոդվածների պատճառով ինչ խնդիրներ են առաջացել սփյուռքում»:
Տաթև ՀԱՐՈՒԹՅՈՒՆՅԱՆ
