Երեկ «Հայկական ժամանակում» հրապարակված Մանվել Գրիգորյանի լուսանկարը սոցցանցերում քննարկումների ու քննադատությունների տեղիք էր տվել:
Այսօր լրագրողները արդարադատության նախարար Արտակ Զեյնալյանից հետաքրքրվեցին, թե այդ լուսանկարի հրապարակման մեջ մարդու իրավունքների խախտում տեսնո՞ւմ է: Հիշեցնենք, որ լուսանկարում Գրիգորյանը մեկուսարանում է, հետեւաբար հարց է՝ անազատության մեջ գտնվող անձի լուսանկարը հրապարակելը մարդու իրավունքների խախտում չէ՞:
Արտակ Զեյնալյանը պատասխանեց. «Մանվել Գրիգորյանի լուսանկարի հետ կապված, դատապարտելի է, երբ դատապարտյալին լուսանկարում են եւ դատապարտյալի լուսանկարը հրապարակում են: Սա իրավունքի խախտում է իմ կարծիքով: Եթե նույնիսկ ազատազրկվածը կամ դատապարտյալը տվել է իր համաձայնությունը լուսանկարվելու եւ լուսանկարը հրապարակելու, ԶԼՄ-ն պետք է ծանր ու թեթեւ անի՝ հրապարակի՞ այն, թե՞ ոչ, որովհետեւ անազատության մեջ գտնվող անձի կամքը ազատորեն չի ձեւավորվել: Այդ սկզբունքից ելնելով է նաեւ, որ դատապարտյալներին ընտրական իրավունք չի տրվում: Չէ՛ր կարելի լուսանկարել, չէ՛ր կարելի հրապարակել այդ լուսանկարը՝ անկախ անձից, անկախ անձի նկատմամբ եղած վերաբերմունքից: Այդ իրավունքը ունիվերսալ է, չի կարող խտրական ձեւով կիրառվել, պետք է հավասարապես կիրառվի բոլոր դատապարտյալների նկատմամբ»:
Նախարարն ասաց, որ իր հանձնարարությամբ ծառայողական քննություն է իրականացվում. «Լուսանկարը չի արվել «Կենտրոն» ՔԿՀ-ում, դա արվել է շատ ավելի վաղ՝ ձերբակալվածների պահման վայրում: Հարգելի լրագրողներ, ԶԼՄ-ներ, դուք ազատ մամուլն եք եւ արտահայտվելու ազատության երաշխիքն է ձեր ազատությունը: Լրագրողներն իրավապաշտպաններ են ի պաշտոնե, եւ դուք իրավունքի պաշտպանության մունետիկներ եք: Պատիվը, արժանապատվությունը, մարդու մյուս իրավունքները չեն կարող նսեմացվել արտահայտվելու ազատությամբ կամ խոսքի ազատությամբ: Ես խնդրում եմ ուշադիր լինել հրապարակումների նկատմամբ: Եթե անգամ այդպիսի լուսանկար արվել էր եւ հայտնվել էր, ճիշտ կլիներ, որ ԶԼՄ-ն ձեռնպահ մնար այն հրապարակելուց: Հիշեք, դուք իրավապաշտպաններ եք»:
Հռիփոսիմե ՋԵԲԵՋՅԱՆ
