«Ադրբեջանի նախագահ Իլհամ Ալիեւը բոլոր հանդիպումներում շարունակում է խոսել ՀՀ-ի կողմից «օկուպացված» տարածքների եւ ՀՀ-ի հասարակության «դաժանության» մասին. քարոզչական այդ գործիքակազմն առաջիկայում ավելանալու է: Սրան հանգիստ պետք է վերաբերվենք: Ինչ էլ անի Ադրբեջանը, խնդրի միակ կարգավորողն ու ՀՀ անվտանգության երաշխավորը մեր բանակն է»,-«Հենարան» մամուլի ակումբում այսօր, անդրադառնալով արցախյան հակամարտության կարգավորման ներկայիս փուլին, ասաց միջազգայնագետ Սուրեն Սարգսյանը: Նրա համոզմամբ՝ թեեւ ռազմական գործողությունների վերսկսման հավանականության մասին շարունակվող կարծիքներ կան, Արցախի խնդիրը չի լուծվելու պատերազմի ճանապարհով. «Դրա հնարավորությունն Ադրբեջանը չունի»:
Ինչ վերաբերում է առաջիկայում Արցախի՝ բանակցային սեղանի շուրջ վերադառնալու հնարավորությանը, փորձագետը նշեց. «Չեմ հավատում, որ Արցախը լինելու է բանակցային կողմ, որովհետեւ այդ դեպքում Ադրբեջանն ուղղակի չի մասնակցի բանակցություններին: Ալիեւը չի կարող իր ժողովրդին բացատրել, թե ինչու հանդիպում ունեցավ մի մարդու հետ, որին պարբերաբար անվանել է «հանցագործ» ու «սեպարատիստների առաջնորդ»: Բակո Սահակյանի մասին է խոսքը: Ակնհայտ է, որ դա տեղի ունենալ չի կարող»:
Ըստ Սուրեն Սարգսյանի՝ Արցախն, այնուամենայնիվ, ինչ-որ պահի լինելու է բանակցային սեղանի շուրջ, բայց ոչ՝ այս փուլում. «Արցախի ժողովրդի ձայնը լսելի է լինելու, որովհետեւ հնարավոր չէ առանց ժողովրդին հարցնելու, օրինակ, Մոսկվայում որեւէ փաստաթուղթ ստորագրել: Բայց վստահ եմ, որ եթե Նիկոլ Փաշինյան-Ալիեւ հանդիպումն առաջիկայում լինի, Արցախի ներկայացուցիչ այդտեղ չի լինելու»:
Լուիզա ՍՈՒՔԻԱՍՅԱՆ
