«Կարծում եմ, որ Ռոբերտ Քոչարյանին առաջադրված մեղադրանքը հիմնավոր է: Վերաքննիչ քրեական դատարանի՝ նրան կալանքից ազատելու դատական ակտը վիճահարույց է: Ակնկալիք կա, որ Վճռաբեկ դատարանն առաջիկայում այդ հարցի շուրջ կհրապարակի կասկած չհարուցող դատական ակտ»,-«Հայացք» մամուլի ակումբում այսօր անդրադառնալով Մարտի մեկի հայտնի քրեական գործով ՀՀ սահմանադրական կարգը տապալելու համար մեղադրվող երկրորդ նախագահ Ռոբերտ Քոչարյանի գործին, ասաց փաստաբան Նորայր Նորիկյանը: Նա մեկնաբանեց Քոչարյանի պաշտպանների պնդումը, թե պաշտոնաթող նախագահն անձեռնմխելի է եւ չի կարող քրեական հետապնդման ենթարկվել՝ իր լիազորությունների շրջանակում կատարած գործողությունների համար:
«Քոչարյանի փաստաբանների պաշտպանական մարտավարությունը կառուցված է այն դրույթի վրա, որ նա ունի բացարձակ անձեռնմխելիություն: Նման բան չի կարող գոյություն ունենալ: Սահմանադրության այդ հոդվածը չի կարելի տարանջատել մյուս հոդվածներից եւ դրա շուրջ միայն կառուցել պաշտպանական մարտավարությունը: Այդ Սահմանադրության 5-րդ հոդվածն, օրինակ, սահմանում է, որ պետական եւ ՏԻՄ մարմինները, այդ թվում՝ նախագահը, կարող են իրականացնել միայն Սահմանադրությամբ իրենց ամրագրված իրավունքները: Հետեւաբար, Քոչարյանը կարող էր անել միայն այն, ինչ նախատեսված է ՀՀ սահմանադրությամբ: Սահմանադրությամբ ասվում է նաեւ, որ բոլորը հավասար են օրենքի առաջ»,-պարզաբանեց Նորայր Նորիկյանը:
Նա նաեւ հիշեցրեց, որ Սահմանադրությամբ՝ զինված ուժերը քաղաքական հարցերում պահպանում են չեզոքություն եւ ապահովում են ՀՀ անվտանգությունը. «Սահմանադրությամբ միայն մեկ բացառություն է սահմանված նախագահի համար՝ ԶՈՒ-ի օգտագործման մասին որոշում կայացնելիս: Այդ որոշումը կարող էր կայացվել միայն այն դեպքում, եթե դրան նախորդած լիներ ռազմական դրության մասին հրամանագրի ստորագրումը: Իսկ նման բան նրա կողմից չի հայտարարվել, այլ հայտարարվել է արտակարգ դրություն: Քոչարյանը պահպանել է արտակարգ դրություն հաստատելու մասին իրավական ընթացակարգը, բայց այդ հրամանագրում որոշում է կայացրել զինված ուժերի օգտագործման մասին, որի իրավունքը նա չուներ: Հետեւաբար, ԶՈՒ օգտագործման մասին որեւէ որոշում, այդ թվում՝ 0038 հրամանը, եթե դրան չի հաջորդել ռազմական դրության մասին հրամանագիր, չի բխում նախագահի սահմանադրական կարգավիճակից: Այսինքն, սահմանադրությունը նրան նման իրավասություն չի տվել»:
https://www.facebook.com/aravot.am/videos/2105690616129693/
Լուիզա ՍՈՒՔԻԱՍՅԱՆ
