Սովորական սպիտակուցային թխվածքաբլիթները` բեզեները, կարող են դառնալ շատ տոնական եւ գեղեցիկ աղանդեր, ընդամենը մի քանի հատիկ հատապտղի շնորհիվ:
Անհրաժեշտ մթերքները
Ձվի սպիտակուց- 4 հատ
Շաքարավազ- 3 ճաշի գդալ
Սպիտակ գինու կամ խնձորի քացախ-1 ճաշի գդալ
Կարտոֆիլի կամ եգիպտացորենի օսլա- 1 ճաշի գդալ
Կարմիր գունանյութ- մի պտղունց կամ եթե հեղուկ է` 1-2 կաթիլ
Նարնջի կամ ելակի ջեմ- 2 ճաշի գդալ
Հատապտուղներ- կես բաժակ
Պատրաստման եղանակը
Ձվի սպիտակուցներն առանձնացնել: Դեղնուցներից կարող եք փխրուն թխվածքաբլիթներ պատրաստել կամ տնական մայոնեզ:
Եթե ձուն սառնարանից եք հանել, թողեք մի 10-15 րոպե, որպեսզի սպիտակուցները հասնեն սենյակային ջերմաստիճանի, որից հետո լավ հարեք, սկզբում` ցածր արագությամբ, այնուհետեւ` բարձր: Երբ ծավալը գրեթե եռակի ավելացած լինի, ավելացրեք շաքարավազը, շարունակեք հարել: Հենց շաքարավազը լուծվի, ավելացրեք նաեւ քացախն ու օսլան, նաեւ` գունանյութը: Մեկ րոպե էլ հարեք եւ բավական է:
Ջեռոցը միացրեք 150 աստիճան: Մինչ ջեռոցը տաքանում է, ջեռոցի տապակի վրա դրեք յուղաթուղթ եւ բեզեից ճաշի գդալով դրեք յուղաթղթի վրա: Եթե ժամանակ ունեք, լցրեք ձեւավորման համար նախատեսված տոպրակի մեջ եւ այդ ձեւով փոքրիկ «ամպիկները» ստացեք:
Ջեռոցն արդեն տաքացած կլինի: Բեզեն դրեք ջեռոցի մեջ եւ անմիջապես ջերմաստիճանն իջեցրեք մինչեւ 90 աստիճան: Թողեք բեզեները չորանան մոտավորապես 1-1,5 ժամ: Պետք է լավ չոր լինեն, թեթեւ ճաքճքած:
Նարնջի կամ ելակի ջեմը մի թեթեւ տաքացրեք, քսեք բեզեների վրա, ապա ջեմի վրա մի քանի հատ հատապտուղ դրեք` մոշ, ազնվամորի, ելակ, հապալաս, ինչ ունեք կամ հարմար եք գտնում: «Վարդագույն ամպիկները» պատրաստ են, կարող եք մատուցել:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
