Հայաստանի բռնցքամարտի ֆեդերացիայում խմորումները չեն հանդարտվում: Ֆեդերացիայի քաղաքականությունից դժգոհ մարզիչների ու ղեկավարության միջեւ հաշտություն ձեռք չի բերվում, ինչից տուժում է մարզաձեւը: Դժգոհողները հարցին միջամտել խնդրել էին ՀԱՕԿ նախագահ Գագիկ Ծառուկյանին, որը խոստացել էր ուսումնասիրել խնդիրը եւ լուծման տարբերակ գտնել:
Ֆեդերացիայի նախագահ Արթուր Գեւորգյանը, ինչպես ինքը հայտարարեց այսօր հրավիրված մամուլի ասուլիսում, ժամանակավորապես կասեցրել էր իր լիազորությունները՝ նախագահի նոր ընտրություններ կազմակերպելու նպատակով, մանավանդ, որ բռնցքամարտի ֆեդերացիան գլխավորելու ցանկություն հայտնող էլ կա: Որոշվել էր նաեւ ընտրության օրը: Սակայն նախանշված օրից առաջ կայացել է ՀԲՖ հերթական նիստ, որտեղ Արթուր Գեւորգյանը առանց մրցակցի վերընտրվել է նախագահ:
Ընդդիմադիրները չեն ընդունում, որ նիստը եւ քվեարկությունը օրինական են եւ պահանջում են նոր ընտրություն, ընդհուպ մինչեւ այլընտրանքային ֆեդերացիայի ձեւավորում:
Արթուր Գեւորգյանը լրագրողներին հայտարարեց, որ ամեն բան կատարվել է ՀԿ-ների մասին օրենքի եւ ԱԻԲԱ-ի պահանջներին համապատասխան եւ հավելեց, որ ոչ սպորտի պետական կառույցը, ոչ ՀԱՕԿ-ը իրավունք չունեն միջամտել ֆեդերացիայի ներքին գործերին, հակառակ դեպքում ֆեդերացիան կդիմի ՄՕԿ:
Լրագրողներից մեկի հարցին, թե հնարավո՞ր է, որ ինքը առաջադրվի ՀԱՕԿ նախագահի պաշտոնում, Արթուր Գեւորգյանը հարցը համարեց սադրիչ, սակայն հավելեց, որ ոչինչ չի բացառվում եւ երբ օրը գա, իր որոշման մասին կարտահայտի:
Աշոտ ՀԱԿՈԲՅԱՆ
