Մարտի մեկի գործով ՀՀ սահմանադրական կարգը տապալելու համար մեղադրվող ՀՀ երկրորդ նախագահ Ռոբերտ Քոչարյանի պաշտպաններից Հայկ Ալումյանն այսօր «Հայելի» մամուլի ակումբում լրագրողների հետ հանդիպմանը կրկին բարձրաձայնեց հանրության կողմից Քոչարյանի պաշտպանների հանդեպ անհանդուրժողականության, պարբերաբար հնչող վիրավորանքների ու սպառնալիքների խնդրի մասին: «Կարծես երեք միլիոն մարդ հայտնվել է «դատավորի» կարգավիճակում, մինչդեռ լավ դատավորը մինչեւ որոշում կայացնելը լսում է երկու կողմերին էլ, նրան չեն նյարդայնացնում պաշտպանական կողմի կարծիքները»,-նկատեց Հայկ Ալումյանը:
Ռոբերտ Քոչարյանի հանդեպ քրեական գործի մասին Հատուկ քննչական ծառայության այսօրվա հայտարարությունն էլ նա համարում է հանրության հանդեպ «մանիպուլյացիայի» միջոց. «Ինչ ասում է ՀՔԾ-ն, հանրությունն ընդունում է որպես այդպիսին: Սա մարդկանց զգացմունքների հետ խաղալու մեթոդ է»: Հիշեցնենք՝ փաստաբանը քննադատել էր ՀՔԾ-ի նախորդ հայտարարությունը եւս:
Հայկ Ալումյանը նշեց. «Մի պահ ուզում էի հայտարարեի, որ այս բիրտ ճնշումն աննախադեպ է, հետո հիշեցի նախադեպը: Երբ առաջին նախագահն ընտրվեց, կանայք կարող էին ջարդել այլախոհներին, նրանց «բե-տե-էռ» էին անվանում (նկատի ունի՝ «զրահամեքենա»՝ փոխաբերական իմաստով):
Հիշո՞ւմ եք ՀՀՇ-ի Գեւորիկին…մտավախություն ունեմ՝ հանկարծ ներկայիս լուսավոր երիտասարդները չդառնան ՀՀՇ-ի Գեւորիկ…արդարադատությունն անհնարին է դառնում նման պայմաններում: Միայն այն փաստը, որ այս փուլում նման բիրտ ճնշում կա, խոսում է այն մասին, որ դատավարության արդյունքները կլինեն ոչ լեգիտիմ»:
https://www.facebook.com/aravot.am/videos/679917209034391/%C2%A0
Լուիզա ՍՈՒՔԻԱՍՅԱՆ
Շատ ափսոսում եմ, պարոն Ալումյան: Մի ժամանակ Դուք էլ էիք լուսավոր: Ւսկ երիտասարդների համար մի անհանգստացեք, իրենք ճիշտ ուղու վրա են: Մեր ժողովուրդը շատ ներողամիտ է, բայց երբեք չի ներում, երբ կպնում են իր նվիրական զգացմունքներին: Միթե չեք լսում ինչ են ասում շատ հարգված, պատկառելի, բանիմաց մարդիկ. նրա՞նք էլ են ՀՀՇ-ի Գևորիկ: