Թեեւ Մարտի 1-ի գործով մեղադրյալ ՀՀ երկրորդ նախագահ Ռոբերտ Քոչարյանի անձեռնմխելիության շուրջ տարատեսակ մասնագիտական կարծիքներ են հնչում, նրա պաշտպանների պարզաբանումը մեկն է՝ պաշտոնաթող նախագահն օրենքով է անձեռնմխելի: Ռոբերտ Քոչարյանի պաշտպաններից Հայկ Ալումյանն այսօր «Հայելի» մամուլի ակումբում լրագրողների հետ հանդիպմանն ասաց. «Եթե նախագահը կատարել է գործողություն, որն իրավապահները համարում են հանցանք, բայց որը, սակայն, նա կատարել է որպես նախագահ, այսինքն՝ իր լիազորությունների շրջանակում, ապա օրենքով՝ նա պատասխանատվության չի կարող ենթարկվել»:
Հայկ Ալումյանը նկատեց. «Ասում են՝ լավ չի, որ նման կետ կա Սահմանադրությունում, բայց փաստն այն է, որ այս պահին անձեռնմխելիության հոդվածը չունի բացառություն: Գուցե պետք է մեխանիզմ մշակել՝ այդ անձեռնմխելիությունը շրջանցելու համար, բայց ներկայիս Սահմանադրությամբ այդ անձեռնմխելիությունը բացարձակ է»:
Ինչ վերաբերում է կարծիքներին, թե բացարձակ անձեռնմխելիություն լինել չի կարող, փաստաբանը մեկ օրինակ մատնանշեց. «Եթե, ասենք, նախագահն իր վարորդի փոխարեն նստի ղեկին, ՃՏՊ-ի ենթարկվի եւ դրա հետեւանքով մարդ զոհվի, լիազորությունների դադարեցումից հետո նա կենթարկվի քրեական հետապնդման, որովհետեւ այդ գործողությունը նա կատարել է ոչ որպես նախագահ»:
https://www.facebook.com/aravot.am/videos/679917209034391/
Լուիզա ՍՈՒՔԻԱՍՅԱՆ
