Արթուր Վանեցյանն այսօր անդրադառնալով նախկին վարչապետ Հովիկ Աբրահամյանի եղբոր՝ Հենրիկ Աբրահամյանի օբյեկտից զենք-զինամթերքի հայտնաբերմանը եւ այն կասկածներին, որ այդ զենքերը հնարավոր է օգտագործված լինեն մարտի 1-ի իրադարձությունների ժամանակ, ասաց, որ դեռ փորձաքննություն է ընթանում. «Փորձաքննությունը երկար է տեւում: Դա կոմպյուտերով անելու չէ, ֆիզիկապես է կատարվում: Ամեն զենքից պետք է պարկուճ արձակեն եւ դնեն միկրոսկոպով նայեն»:
Ըստ Վանեցյանի, այդ հարցին ավելի ստույգ կպատասխանի ՀՔԾ-ն:
Հարցին առաջիկայում կա՞ն բացահայտումներ, Արթուր Վանեցյանն ի պատասխան ասաց, որ այդ մասին իրեն հարցեր չուղղեն, քանի որ առաջիկա բացահայտումների մասին, երբեւէ որեւէ տվյալ չի հայտնելու:
Արթուր Վանեցյանից նաեւ հետաքրքրվեցին, թե այս 100 օրերի ընթացքում ԱԱԾ-ն ինչպիսի ձեռքբերումներ ունեցավ: Ի պատասխան ԱԱԾ ղեկավարն ասաց. «Շատ մեծ ձեռքբերումներ է ունեցել: Մի տվյալ կարող եմ ասել, որ 2017 թվականին պետական բյուջե վերականգնված գումարի չափը եւ այս 100 օրվա պետբյուջե վերականգնված գումարի չափը մոտ 8-9 անգամ ավել է»:
Հարցին, թե, այսինքն՝ ամենախոշոր բացահայտումներն արդեն արվե՞լ են, Վանեցյանը պատասխանեց՝ չեն արվել:
Ինչո՞վ է պայմանավորված, որ մինչ այդ ԱԱԾ-ն նման բացահայտումներ չի արել, Վանեցյանն ասաց, որ քաղաքական հայտարարություններ չի ցանկանում անել, միայն ասաց, որ ներկայիս գործելակերպը նաեւ պայմանավորված է նոր կառավարության եւ վարչապետի մոտեցումներով, որոնք տարբերվում են նախկին իշխանությունների մոտեցումներից:
Լուսինե ԲՈՒԴԱՂՅԱՆ
