«Էդ ո՞վ է ձեզ անգրագետ ասել, պետք է նման մարդու պատասխանատվության կանչեիք». Արայիկ Հարությունյանը՝ ուսանողին

Այսօր ԿԳ նախարար Արայիկ Հարությունյանը Կասկադում հանդիպեց ուսանողների ու աշակերտների հետ ու պատասխանեց նրանց հարցերին:

Հարց եղավ՝ Հայոց եկեղեցու պատմություն առարկան շարունակելո՞ւ է դասավանդվել, ի՞նչ փոփոխություն է կրելու՝ Արայիկ Հարությունյանը պատասխանեց. «Իրականում այս առարկան մեր քաղաքացիների մի մասի համար խնդրահարույց է, մյուս մասը ցանկանում է, որ առարկան պահպանվի, գոնե առաջիկա մեկ տարվա ընթացքում մենք բոլոր շահագրգիռ կողմերի հետ քննարկում ենք անցկացնելու: Սիրո եւ համերաշխության մթնոլորտում կարող ենք ցանկացած հարց քննարկել, այդ թվում նաեւ այդ առարկայի հարցը եւ խելամիտ որոշումներ ընդունել ոչ միայն այդ առարկայի, այլեւ մյուս առարկաների հետ կապված»:

Ուշագրավ էր, որ ԵՊՀ մի ուսանողուհի մասնագիտական գրականության թարգմանության հարցն ուղղեց նախարարին՝ ասելով, որ երբ համալսարանում ռեկտորի հետ հանդիպման ժամանակ այդ հարցն ուղղում են իրենց, պատասխանում են՝ «ուրեմն անգրագետ եք ու չեք ուզում կարդալ ռուսերեն»: Ուսանողի խոսքով՝ «Այստեղ կա կարեւոր հարց, մասնագիտական գրականությունը պիտի թարգմանվի, որովհետեւ եթե հայտարարվում է, որ համալսարանում կրթությունը հայերեն է, ուրեմն պարտավոր են դասագրքային մակարդակով ուսանողի համար ունենալ հայերեն գրականություն: Շատ մարդիկ կան, որ, օրինակ, Սիրիայից, Հալեպից գալիս են Հայաստան, ընդունվում են համալսարան, իրենք չունեն ռուսերենի տարրական կրթություն, իրենց համար խնդիր է ռուսերենով մասնագիտական գրականություն կարդալը»:

Նախարարը հետաքրքրվեց, թե ո՞ր ֆակուլտետում է սովորում ուսանողուհին, վերջինս պատասխանեց՝ հոգեբանության. «Էդ ո՞վ է ձեզ անգրագետ ասել», – հարցրեց նախարարը, հետո հավելեց. «Բուհում չգիտեմ ձեզ ով է վիրավորել եւ շատ վատ է արել, որ վիրավորել է, դուք որպես ուսանող եւ ձեր ընկերները պետք է նման մարդու պատասխանատվության կանչեիք»:

Արայիկ Հարությունյանն ասաց, որ մասնագիտական գրականությունը պետք է փորձել նաեւ այլ լեզուներով կարդալ, աշխարհը փոփոխվում է եւ այդ ծավալը թարգմանելը պրակտիկորեն անհնար է:

Նա խոսեց բուհերի արդյունավետ կառավարման մասին: Իսկ թե ինչպե՞ս պետք է արդյունավետ կառավարել՝ նա ասաց. «Կան մեթոդներ, օրինակ, ուսանողների ակտիվության միջոցով արդար իշխանության միջոցում,օրինակ, դասախոսների եւ գիտխորհուրդների ավելի ակտիվ գործողություններով, կարծրացած եւ փոփոխությունների չգնացող ռեկտորների փոփոխությամբ»:

Հռիփսիմե ՋԵԲԵՋՅԱՆ