Արձակուրդի շրջանով պայմանավորված՝ «Հիմնադիր խորհրդարան» շարժման եւ «Սասնա ծռերի» աջակից Փայլակ Թևանյանի գործով դատական նիստն այսօր չի կայացել: Թեւանյանն Aravot.am-ի հետ զրույցում տեղեկացրեց, որ դատաքննությունն ավարտվել է, առաջիկայում մեղադրող-դատախազը հանդես կգա մեղադրական ճառով:
Հիշեցնենք՝ երիտասարդին մեղադրանք է առաջադրվել այն բանի համար, որ նա դատական կարգադրիչի հանդեպ բռնություն է գործադրել՝ ապտակել է: Մասնավորապես, այս տարվա հունիսի 28-ին «Սասնա ծռերի» գործով հերթական դատական նիստի շրջանակում նա դատարանի շենքի դիմաց աջ ձեռքով դիտավորությամբ հարվածել է դատական կարգադրիչ Առաքել Արզումանյանի դեմքին`վերջինիս պատճառելով ֆիզիկական ցավ:
Ամփոփելով միջադեպի վկա-ոստիկանների, նաեւ՝ տուժող-կարգադրիչի՝ դատարանում տված ցուցմունքները՝ մեր զրուցակիցը նշեց, որ դրանց բովանդակության հետ ամբողջությամբ համաձայն չէ: «Նրանք միջադեպը նկարագրում էին այնպես, ինչպես եղել է, բացառությամբ այն պահի, երբ պետք է խոսվեր ապտակի մասին: Ադեկվատ ցուցմունք տվողներն ասում էին, որ չեն տեսել նման բան, իսկ մյուսները պնդում էին, որ տեսել են»,-նշեց Թեւանյանը:
Նա շարունակեց. «Ապտակի դրվագը տուժող-կարգադրիչի կողմից չափազանցված է ներկայացվում: Նա ասում է, թե ես ագրեսիվ եմ մոտեցել իրեն, ապտակել, ինքն էլ շոկի մեջ է ընկել, բայց նման բան չի եղել: Պարզապես այս փուլում չեմ ասի, թե իրականությունն ինչ է, որովհետեւ հրաժարվել եմ ցուցմունք տալուց»:
Լուիզա ՍՈՒՔԻԱՍՅԱՆ
