Այսօր ժամը 12-ին պետք է կայանար երկրորդ նախագահ Ռոբերտ Քոչարյանի մամուլի ասուլիսը, բայց, ինչպես արդեն հայտնել ենք, այն տապալվեց:
Մինչ ասուլիսը «Էրեբունի պլազա» հյուրանոցի մոտ, որտեղ պետք է կայանար այն, «Պրիվետ, Ռոբ» ակցիայի մասնակիցները բողոքի ցույց էին անում: Քոչարյանի պաշտպան, փաստաբան Հայկ Ալումյանին ակտիվիստներից մեկը հարցրեց. «Ծռերի դատով դուք դատապաշտպան էիք, այնտեղ ասում էիք՝ ծռերը ժողովրդի իրավունքն են պաշտպանել, ոտնահարվել է ժողովրդի իրավունքը, հիմա ստեղ եկել ասում եք՝ սահմանադրական կարգը չի խանգարվել, էդ ո՞նց հասկանանք»:
Ալումյանը պատասխանեց. «Այնտեղ ես հիմնավորել եմ, որ որոշակի պարագայում ապստամբելու իրավունքը ժողովրդի իրավունքն է, որպեսզի թյուր կարծիք չստեղծվի, թե ես այնտեղ ինչ եմ ասել, ընդ որում, միջնորդել էի, որ դիմվի Սահմանադրական դատարան, որ ճանաչվի ապստամբելու իրավունքը: Իսկ ի՞նչ եմ ասում այս գործով. այն, որ դուք ասում եք՝ 10-11 զոհ, 10 զոհ չի մեղսագրվում Ռոբերտ Քոչարյանին, նույնիսկ մեկ զոհ չի մեղսագրվում: Սահմանադրական կարգը տապալելը ընդհանուր բառ է, որպեսզի պատկերացնեք այնտեղ ինչ է գրված՝ մեղադրանքը ունի 5 էջ, այնտեղ ինչ-որ բաներ են գրված, որը մինչեւ այսօր չի հրապարակվել: Ես դա չեմ կարող հրապարակել, իրավունք չունեմ, որպեսզի կարողանամ առարկայական ձեզ հետ քննարկել: Պրոբլեմը դա է: Վարույթն իրականացնող մարմինը հրապարակում է այն հատվածը, որն ուզում է հրապարակել ու քննարկումը դրա շուրջ է լինում: Դժվար է ձեր հարցերին պատասխանել՝ իրավունք չունենալով անգամ մեղադրանքի մի տողն ասել»:
Ակտիվիստը շարունակեց դժգոհել՝ Ալումյանին ասելով. «Դուք ասում եք՝ ապստամբության իրավունք, ապստամբության իրավունքը այն ժամանակ է լինում, երբ ժողովուրդը տեսնում է, որ ոչ մի ձեւով իր սահմանադրական իրավունքը չի պաշտպանվում, խախտվել է: Դուք ասում էիք՝ 30 տարի խախտվել է ժողովրդի իրավունքը, անընդհատ խախտվել է: Այնտեղ ասում էիք՝ խախտվել է, այստեղ չի խախտվե՞լ: Այս հակասությունը ո՞նց եք բացատրում, մի մարդ նույն հարցի վերաբերյալ երկու տարբեր կարծիք չի կարող ունենալ, ոնց որ այստեղ ասեմ՝ էս մարդն անմեղ է, գնամ մյուս տեղն ասեմ՝ մեղավոր է, էդպես չի լինում»:
Հռիփսիմե ՋԵԲԵՋՅԱՆ
