Քրեական աշխարհում «Երրորդմասցի Լյովիկ» մականվամբ հայտնի Լեւոն Ղազարյանի եւ նրա երկու ընկերների սպանության գործով հերթական դատական նիստում այսօր դիրքորոշում պետք է հայտներ տուժողի իրավահաջորդներից մեկը, սակայն նա չէր կարողացել նիստին ներկայանալ:
Հիշեցնենք, որ Վահան Հակոբյանը (քրեական աշխարհում հայտնի որպես «Գաստիկ»), Սարգիս Հախանումյանն («Տլե») ու Սարգիս Գրիգորյանը(«Ծըգլ») մեղադրվում են 2015թ. մարտի 4-ին քրեական հեղինակություն համարվող Լեւոն Ղազարյանին՝ «Երրորդմասցի Լյովիկ», եւ նրա երկու ընկերներին՝ Դրաստամատ Թադեւոսյանին եւ Մեսրոպ Նազարյանցին սպանելու համար: Սպանված Դրաստամատ Թադեւոսյանի կինը՝ Իրինա Մարտիրոսյանը դատարանին գրության միջոցով էր դիրքորոշում ներկայացրել:
Նա դատավոր Արտուշ Գաբրիելյանին ուղղված նամակում գրել էր. «Ուշադիր հետեւել ենք դատավարությանը ու սպասում ենք արդար դատական ակտի կայացմանը: Իմ չներկայանալու պատճառը մեղադրվողներին տեսնելուց խուսափելն է, դա անհաղթահարելի արգելք է ինձ համար: Դատարանի կողմից արդար դատական ակտի կայացման հարցում կասկածներ ունենք, քանի որ գործը անհարկի պատճառներով անընդհատ ձգձգվել է: Հուսով ենք, որ նոր իրականությունում դուք կարող եք արդար դատական ակտ կայացնել, բայց Ձեզ դեռեւս չենք վստահում»:
Նամակում կինը դատավորին հիշեցրել է, որ նա ոչ թե գողության կամ խարդախության գործ է քննում, այլ երեք անձի սպանության. «Նրանց սպանելը եղել է միջոց՝ նպատակին հասնելու համար: Պատկերացնո՞ւմ եք այն մարդկանց դաժանությունը, որոնք պատրաստ են եղել մի քանի անձի սպանել»:
Ապա երեք մեղադրյալների շահերի պաշտպան Երվանդ Վարոսյանը հանդես եկավ պաշտպանական ճառով՝ համոզմունք հայտնելով, որ մեղադրանքը ենթադրությունների վրա է հիմնած. «Չկա ապացույց, որ մեղադրանքը հիմնավորված է: Վկաները դեպքի վայրից հեռացողներին տեսել են, բայց չեն ճանաչել դատական նիստերի դահլիճում: Միակ օրինական դատական ակտը կլինի արդարացման ակտը, որը իրավապահներին հնարավորություն կտա հայտնաբերել սպանությունը կատարողներին»:
Հետո խոսքի իրավունք տրվեց մեղադրյալներին, որոնք դատավարության ընթացքում հիմնականում լռում էին եւ միայն հայտարարում, որ իրենց մեղավոր չեն ճանաչում: Նրանք ասացին, որ միանում են պաշտպանի դիրքորոշմանը: Միայն Վահան Հակոբյանը՝ «Գաստիկը», շեշտեց. «Մենք չենք իմանում, թե ինչի համար ենք նստած, մեր կյանքից է սա գնում…»:
Հաջորդ դատական նիստում մեղադրող-դատախազը պաշտպանական ճառի վերաբերյալ հանդես կգա ռեպլիկով: Լարված մթնոլորտում անցնող դատավարությունը մոտենում է ավարտին:
https://www.facebook.com/aravot.am/videos/1320544898082187/
Լուիզա ՍՈՒՔԻԱՍՅԱՆ
