«Տուգանքներից պետք է անցնենք հորդորական, քարոզչական քաղաքականության, միայն տուգանքներով ոչնչի չենք կարող հասնել»,- օգոստոսի 14-ին «Տեսակետ» ակումբում ասաց Լեզվի կոմիտեի նախագահ Դավիթ Գյուրջինյանը` հիմնավորելով, որ զուտ տուգանելով հնարավոր չէ անաղարտ պահել մայրենին:
Հավելեց, որ լեզվական վերահսկողություն են իրականացնելու նաեւ ԶԼՄ-ների նկատմամբ, նրանց եւս հորդորական նամակներ են ուղարկելու, ուղիղ աշխատելու են ՏԻՄ-երի հետ: Դավիթ Գյուրջինյանը հույս ունի, որ տեղական ինքնակառավարման մարմինները եւս լեզվական յուրահատուկ տեսուչների դեր կկատարեն`օրինակ, թեկուզ չարտոնելով օտարալեզու, օտարագիր ցուցանակները:
«Կանխարգելիչ լայնածավալ քարոզչության միջոցով պետք է շտկենք հրապարակային գրվածքները, որոնց հեղինակները մենք ենք: Նախ ինքներս պետք է փոխվենք, կոմիտեն պետք է փորձի փոխել վերաբերմունքը պետական լեզվի նկատմամբ»,- ասաց պարոն Գյուրջինյանը:
Անդրադառնալով Լեզվի մասին օրենքին, Լեզվի կոմիտեի նախագահը հիշեցրեց, որ ժամանակին ռուսերենի գերիշխող ներկայությունը ստիպեց, որ Հայաստանում ունենանք Լեզվի մասին օրենք, որը բավական խիստ շեշտադրումներ կունենա:
Մանրամասները` տեսանյութում:
Նրա ձեւակերպմամբ, Լեզվի կոմիտեն 18-19 հոգով չի կարողանա հաջողել, եթե չունենա հասարակության աջակցությունը: Պարոն Գյուրջինյանը փաստեց, որ 2002 թ-ից հետո մեր երկիրը չի ունեցել պետական լեզվական քաղաքականության ծրագիր: «Լեզվի տեսչությունը շրջանառության մեջ էր դրել 2018-23 թթ. մի ծրագիր, որը, սակայն, չի հաստատվել: Հիմա մենք պետք է մշակենք նախ հայեցակարգ, այնուհետեւ ծրագիր, որը պետք է նոր հայացք լինի»,-ընդգծեց բանախոսը:
Մանրամասները` տեսանյութում:
Դավիթ Գյուրջինյանը նշեց, որ լեզվական քաղաքականության ծրագրի մշակումից հետո կբխի իրենց անելիքը, որը ոչ թե տուգանելն է, այլ նպաստելը հայերենի զարգացմանը, տարածմանը ՀՀ-ից դուրս ապրող հայերի շրջանում, Սփյուռքի պարագայում էլ` հայերենի պահպանմանը:
Լեզվի կոմիտեի նախագահը, որ նաեւ բազմաթիվ դասագրքերի հեղինակ է, անդրադառնալով միասնական քննություններին, հայոց լեզվի ցածր արդյունքներին ու շտեմարաններին` ասաց, որ շտեմարանները վաղուց իրենց սպառել են, սերտ կապ չունեն դպրոցական ուսուցման հետ: «Դրանք պետք է փոխվեն, մենք պետք է հրաժարվենք այդ տեսակից»:
Մանրամասները` տեսանյութում:
Գոհար ՀԱԿՈԲՅԱՆ
