Այսօր երկրորդ նախագահ Ռոբերտ Քոչարյանի մամուլի ասուլիսը, ինչպես տեղեկացրել ենք, չկայացավ:
«Պրիվետ, Ռոբ» ակցիայի մասնակիցները ասուլիսը տապալելուց հետո երթով շարժվեցին դեպի դատախազություն, այնուհետեւ՝ Բարձրագույն դատական խորհուրդ:
Բողոքի ցույցի մասնակիցների թվում էր նաեւ Մարտի 1-ի զոհերից Գոռ Քլոյանի հայրը՝ Սարգիս Քլոյանը: Նրա խոսքով՝ «Իմ երեխայի բալիկները չեն ասել իրենց հորը, չգիտեն պապա բառն ինչ է: Ռոբե՛րտ Քոչարյան, դու ո՞նց ես տանելու իմ թոռների դժբախտությունը, որ չգիտեն պապա բառն ինչ է, դու ինչպե՞ս ես վճարելու, էդ միլիարդներիդ կեսը պիտի տաս, որ տամ իմ թոռնիկների՞ն, մարդասպա՛ն: Քոչարյանին պետք է հենց այսօր ձերբակալել, պետք է ցմահ ազատազրկվի, մեր ակնկալիքը դա է: Նիկոլ Փաշինյանը պետք է հրաման տա դատախազությանը ձերբակալել մարդասպանին»:
Սարգիս Քլոյանն ասաց, որ երեկ, երբ իմացել են, որ Վերաքննիչ դատարանը որոշել է, թե Քոչարյանն անձեռնմխելի է, իր եւ մյուս տուժողների հարազատների ճնշումը բարձրացել է, տեղները չեն գտել. «Շոկի մեջ էինք: Վահե Գրիգորյանը ելույթ ունեցավ, մի փոքր ոնց որ հանգստացանք, սպասում ենք Վճռաբեկ դատարանին, տեսնենք ինչ կասի Վճռաբեկը»:
Հռիփսիմե ՋԵԲԵՋՅԱՆ
