«Հայաստանի Հանրապետությունում հաստատված է ժողովրդի իշխանություն եւ հավատացած եղեք` Հայաստանի Հանրապետությունում չկա, գոյություն չունի որեւէ ուժ, որ ի վիճակի լինի կանգնել ժողովրդի իշխանության առաջ, որ ի վիճակի լինի կանգնեցնել ժողովրդական հեղափոխության հաղթանակը: Ով կանգնի այդ ճանապարհին, կհայտնվի պատմության աղբանոցում: Ուզում եմ ձեզ հավաստիացնել, որ ինչպես նախկինում բազմիցս ասել եմ Հանրապետության հրապարակում` ձեր առաջ կանգնելով, Հայաստանի Հանրապետությունում օրինականության հաստատումը այլընտրանք չունի: Պետության եւ ժողովրդի առաջ հանցագործություն կատարած բոլոր անձինք ենթարկվելու են պատասխանատվության: Օրինականության հաստատման ճանապարհը այլընտրանք չունի»,- ֆեյսբուքյան ուղիղ միացմամբ օգոստոսի 14-ին հայտարարեց ՀՀ վարչապետ Նիկոլ Փաշինյանը:
Վարչապետի ձեւակերպմամբ. «Բոլորը պատասխան են տալու իրենց արածների համար` ՀՀ օրենսդրությամբ սահմանված կարգով, եղանակներով եւ ձեւերով, բայց ուզում եմ նաեւ ասել, որ այս ողջ պրոցեսի ընթացքում մեր կառավարությունը, մեր իշխանությունը նույնպիսի պատասխանատվություն է զգում ձեր առաջ, ՀՀ պետականության, ժողովրդի, օրինականության առաջ:
Եվ մենք նաեւ այս ողջ քաղաքական գործընթացը կազմակերպելու ենք ժողովրդից ստացած լիազորությունների սահմաններում եւ այդ լիազորությունների սահմանները չենք անցնելու ոչ մի պարագայում, որովհետեւ մենք չենք ուզում ուրիշի ապօրինությունները փոխարինել մեր ապօրինություններով: Չենք ուզում ուրիշների թալանը փոխարինել մեր թալանով, չենք ուզում ուրիշների գողացածը տեղափոխել մեր գրպաններ, ուզում ենք ուրիշների գողացածը տեղափոխել ՀՀ պետական բյուջե եւ ծառայեցնել ժողովրդի ու պետության կարիքներին:
Բոլոր հանցագործները ենթարկվելու են պատասխանատվության, ժողովրդից գողացած ամեն մի կոպեկ, ամեն մի լումա վերադարձվելու է ժողովրդին, եւ ոչ բռնի թավշյա ժողովրդական հեղափոխության հաղթարշավը պարզապես այլընտրանք չունի, որովհետեւ ՀՀ-ում կա մի տեր, մի իշխանություն եւ այդ մի տերը, մի իշխանությունը ՀՀ քաղաքացին է»:
Նա կոչ արեց բոլորին օգոստոսի 17-ին 18:30-ին հավաքվել Հանրապետության հրապարակում, որտեղ իր խոսքով` կամփոփվի Հայաստանի քաղաքացու իշխանության 100 օրը եւ կխոսվի քաղաքացու իշխանության եւ ժողովրդական իշխանության հաղթարշավի, արդյունքների, հետագա հաղթանակների մասին:
«Ոչ ոք չի կարող խլել հայ ժողովրդի հաղթանակը եւ դա օգոստոսի 17-ին ժողովուրդը ցույց կտա»,-ասելիքն ամփոփեց Նիկոլ Փաշինյանը:
https://www.facebook.com/nikol.pashinyan/videos/222445755088080/
Գոհար ՀԱԿՈԲՅԱՆ
