«Հայաստանը նպատակ ունի տարանջատել ներպետական-իրավական դատական գործընթացները ՀԱՊԿ-ից, նաեւ՝ ապահովել եւ երաշխավորել ՀԱՊԿ քարտուղարության բնակական գործունեությունն ու դրա անխափանությունը»,-ՀՀ ԱԳՆ-ում լրագրողների հետ զրույցում այսօր անդրադառնալով ՀԱՊԿ գլխավոր քարտուղար Յուրի Խաչատուրովի փոփոխության գործընթացին, ասաց ԱԳՆ մամուլի խոսնակի ժամանակավոր պաշտոնակատար Աննա Նաղդալյանը:
Հիշեցնենք, որ ՀՀ-ն նախաձեռնել է Խաչատուրովի փոխարինման գործընթացը, քանի որ Մարտի մեկի հայտնի գործով նրան մեղադրանք է առաջադրված՝ ՀՀ սահմանադրական կարգը տապալելու համար:
Հարցին ի պատասխան, թե արդյոք ՀՀ ԱԳՆ-ում քննարկում են, թե ով է փոխարինելու Յուրի Խաչատուրովին՝ ՀԱՊԿ գլխավոր քարտուղարի պաշտոնում, Աննա Նաղդալյանը նշեց. «Մենք նախաձեռնել ենք փոխարինելու գործընթաց, իսկ մնացած հարցերը ՀԱՊԿ ներքին քննարկումների դաշտում են: Դա ՀԱՊԿ խորհուրդը պետք է քննարկի»:
Աննա Նաղդալյանը նաեւ տեղեկացրեց, որ շուտով ՀԱՊԿ հերթական գագաթնաժողովն է լինելու, իսկ մինչ այդ Խաչատուրովի փոխարինման հարցով ներքին քննարկումներ են ընթանում. «Որոշումները կներկայացվեն ՀԱՊԿ խորհրդի հաստատմանը: Մինչեւ հոկտեմբեր բավականաչափ աշխատանք կա անելու՝ աշխատանքային քննարկումների ժամանակ»:
Լուիզա ՍՈՒՔԻԱՍՅԱՆ
