«Այդ համաձայնագիրը վերաբերում է այն ստորագրած 5 երկրներին, եւ մենք այստեղ մեկնաբանելու շատ բան չունենք»,-լրագրողների հետ զրույցում այսօր անդրադառնալով Ռուսաստանի, Ադրբեջանի, Իրանի, Թուրքմենստանի և Ղազախստանի միջեւ Կասպյան ծովի «բաժանման» մասին համաձայնագրի ստորագրմանը, ասաց ՀՀ ԱԳՆ մամուլի խոսնակի ժամանակավոր պաշտոնակատար Աննա Նաղդալյանը։ Արձագանքելով հարցին, թե արդյոք դա չի նպաստում ՀՀ-ի մեկուսացմանը, նա շեշտեց. «Ուշադիր հետեւում ենք այն գործընթացներին, որոնք կարող են ուղղակի կամ անուղղակի ազդեցություն ունենալ ՀՀ-ի վրա»:
Դիտարկմանն ի պատասխան, որ համաձայնագրից հատկապես գոհ է Ադրբեջանը, Աննա Նաղդալյանն ասաց. «Ադրբեջանը Կասպյան ափամերձ երկիր է, դրա համար գոհ է։ Մենք հետեւում ենք զարգացումներին եւ դրանց հիման վրա կանենք համապատասխան եզրահանգումներ»:
Լուիզա ՍՈՒՔԻԱՍՅԱՆ
