«Սահմանադրական կարգը տապալելու մեղադրանքը շատ ծանր է, դրանից այն կողմ էլ բան չկա»,-«Հայելի» մամուլի ակումբում այսօր անդրադառնալով Մարտի 1-ի գործով ՀՀ երկրորդ նախագահ Ռոբերտ Քոչարյանի կալանավորմանը, ասաց գրականագետ Դավիթ Գասպարյանը:
«Կարեւորը ճշմարտությունը բացահայտելն է: Եթե նա անմեղ է, ազատություն կստանա: Հիշում եմ՝ այն դժվար ժամանակներում նա ասաց՝ «ո՞ւր է, այստեղ մի տղամարդ կա՞, որ դուրս գա իմ դեմ»…Շատ կարեւոր եւ լավ տղամարդիկ կային, բայց նրանց ժամանակը չէր: Այնպես որ, սպասենք իրավապահների գործողություններին»,-Քոչարյանի 1998թ.-ի հայտնի հարցազրույցից մի հատված հիշեց Դավիթ Գասպարյանը:
Իսկ թե ում է Դավիթ Գասպարյանը համարում այն ժամանակվա «լավ տղամարդ», գրականագետը նշեց. «Երկրի մասին մտածող մարդկանց: Անուններ չեմ ասի: Նրանք չէին խոսում, որովհետեւ ով խոսեր՝ կձերբակալվեր»:
Ըստ Դավիթ Գասպարյանի՝ Ռոբերտ Քոչարյանի դեմ քրեական հետապնդումն, անկասկած, քաղաքական երանգներ է պարունակում. «Մեղադրանքն է քաղաքական, այլ կերպ լիներ չէր կարող»:
https://www.facebook.com/aravot.am/videos/253941841770534/
Լուիզա ՍՈՒՔԻԱՍՅԱՆ
