Դատավոր Դավիթ Բալայանի նախագահությամբ այսօր Վլադիկ Մարտիրոսյանի գործով հերթական դատական նիստն էր: Հիշեցնենք, որ ըստ մեղադրանքի՝ նա 2016թ. կացնով հարվածներ է հասցրել նախկին կնոջ մորը, որը հիվանդանոցում մահացել է, եւ ծանր վիրավորել նաեւ նախկին կնոջը՝ Թագուհուն եւ նրա հորը:
Այս գործով դատավարությունը մոտենում է ավարտին, սակայն, քանի որ գործից առանձնացված մասով վերաքննիչ բողոք է ներկայացվել, դատավորը որոշեց նիստը հետաձգել անորոշ ժամանակահատվածով:
Aravot.am-ի հետ զրույցում Թագուհի Մանսուրյանը տեղեկացրեց, որ սպասում են Վերաքննիչ դատարանի որոշմանը: Նա հիշեցրեց, որ այս քրեական գործից անջատված մասով ինքը եւ նախկին ամուսինը մեղավոր էին ճանաչվել ու դատապարտվել տուգանքի վճարման (Վլադիկ Մարտիրոսյանը նաեւ մեկ տարվա ազատազրկման է դատապարտվել):
Թագուհի Մանսուրյանի փոխանցմամբ՝ իր եւ Վլադիկ Մարտիրոսյանի պաշտպանները միաժամանակ վճիռը բողոքարկել են վերաքննիչ ատյանում, որտեղ հերթական նիստը կկայանա օգոստոսի 30-ին:
Լուիզա ՍՈՒՔԻԱՍՅԱՆ
