«Կազանչյան» ընկերության հիմնադիր, Ժամագործների միության նախագահ Րաֆֆի Կազանչյանը մտադիր է Հայաստանում ժամագործության դպրոց հիմնել. առայժմ բանակցություններ են ընթանում Շվեյցարիայի դեսպանատան հետ: Այսօր այս մասին «Պոստ սկրիպտում» ակումբում ասաց Րաֆֆի Կազանչյանը:
Նա ասաց, որ դպրոցում դասախոսությունների համար նախատեսում են Շվեյցարիայից մասնագետներ հրավիրել, որոնք բացի տեսական գիտելիքներից՝ նաեւ գործնական աշխատանքներում հմտություններ կսովորեցնեն. «Դա ճարտարապետական գործ է, նուրբ ձեռքեր են պետք: Շվեյցարիայում գործարաններում աշխատողների 90%-ը կանայք են, քանի տղամարդու կոշտ-կոպիտ ձեռքերի գործ չէ»:
Րաֆֆի Կազանչյանն ասաց, որ Հայաստանում ժամագործությունը զարգացնելու մեծ ներուժ կա. «Այսօր Շվեյցարիայում ժամացույցների արտադրության ոլորտում մի քանի նշանավոր ընկերություններ կան, որոնց սեփականատերերը հայեր են: Սփյուռքահայության մեջ ընտանիքներ կան, որոնք ժամագործության բիզնես են անում մի քանի տասնամյակներով ու սերունդներով: Հայաստանում Սովետի ժամանակ կար լավ ժամագործություն, այս ամենը միասին օգտագործելով՝ կարող ենք զարգացնել ոլորտը»:
Գործարարը վստահեցրեց՝ բիզնեսում որեւէ խնդիր չունի, բացառությամբ իրացման ծավալների անկման, բայց դա էլ պայմանավորված է աշխարհաքաղաքական իրադարձություններով, հատկապես «Լաքշըրի» կարգի ժամացույցների սպառումը կրճատվել է. «Շվեյցարիայում 100 ամյա մի ցուցահանդես կա, որին բավականին մեծ ընկերությունները արդեն հրաժարվել են մասնակցել: Սա նշանակում է՝ ոլորտը հոգեվարքի մեջ չէ, բայց վատ դրության մեջ է»:
Գործարարը նաեւ վստահեցրեց՝ թավշյա հեղափոխությունը դրական է ազդելու Հայաստանում ժամագործության եւ մեր արտադրանքը դրսում վաճառելու համար:
Կազանչյանը որեւէ դժգոհություն չունի հարկային մարմիններից. «Մի օր 5 տոպրակով եկան, ասացին, որ վերադարձնում են ժամացույցները: Դրանք 10-15 օրվա ընթացքում ամեն մեկը եկել, գնել էր, որ պարզեն՝ ՀԴՄ կտրոն տալի՞ս ենք, թե՞ ոչ: Խնդիր չէ, դա իրենց իրավունքն է: Եթե մաքուր ես աշխատում, ի՞նչ խնդիր կա»:
Նելլի ԲԱԲԱՅԱՆ
