Դավիթ Տոնոյան. «Հավասար պայմաններ ենք ստեղծում գնումների գործընթացում». Պաշտպանության նախարարը պետական գնումներում կոռուպցիոն ռիսկերի մասին (Տեսանյութ)

«Հանրային քաղաքականության հետազոտությունների ազգային կենտրոն»-ի ղեկավար, տնտեսագետ Արտակ Մանուկյանը 2017-2018 թվականների պաշտպանական ոլորտի գնումների մոնիտորինգի արդյունքում մի շարք խնդիրներ էր հայտնաբերել: Օրինակ՝ ՊՆ-ի եւ ոստիկանության գնումներին մասնակցած որոշ ընկերություններ պայմանագրով ներկայացնում են ավելի շատ աշխատող, իսկ զինծառայողների հիմնադրամին կատարած փոխանցումներն  (խոսքը յուրաքանչյուր աշխատակցից հիմնադրամին 1000 դրամների փոխանցման մասին է) ավելի քիչ են:  Բացի այս, տնտեսագետը նաեւ նշել էր, այս ոլորտում պետական գնումներին տարիներ շարունակ մասնակցում են եւ հաղթում խոշոր ընկերություններ, որոնք պաշտոնատար անձանց հետ են կապված:

Տնտեսագետի հայտնաբերած այս խնդիրների մասին այսօր  լրագրողները հետաքրքրվեցին պաշտպանության նախարար Դավիթ Տոնոյանից՝ «Զինծառայողների ապահովագրության հիմնադրամի» հոգաբարձումների խորհրդի նիստից հետո:

Պարոն նախարարը հերքեց, որ ընկերությունները աշխատակիցներ են թաքցնում, նա վստահեցրեց՝ պարզապես վճարումների ուշացումներ են լինում:

Դավիթ Տոնոյանը նաեւ վստահեցրեց. «Հավասար պայմաններ են ստեղծում պետական գնումների գործընթացում»:

Հարցին՝ վերանայելո՞ւ  եք գնումները, երբ 10 խոշոր ընկերություններ են մշտապես շահել, նախարարը պատասխանեց՝ «10 խոշոր ընկերությունները, դեռ չեն նշանակում կոռուպցիա, բայց ռիսկ կա»:

Հարցին՝ ընկերություններ կան, որոնք փողկապակցված են պաշտոնյանների հետ, նախարարը պատասխանեց.«Փոխկապակցվածությունն արդեն կոռուպցիա է»:

Մանրամասները՝ տեսանյութում:

Նելլի ԲԱԲԱՅԱՆ