Ինչպես հայտնի է, Սփյուռքի նախարարության «Արի տուն» ծրագիրն այս տարի չիրականացավ. փոխարենը, այն միաձուլվեց «Սփյուռք ամառային դպրոցին» եւ դարձավ «Քայլ արա դեպի տուն» անվամբ ծրագիր, որն օգոստոսի կեսերից է մեկնարկում: Սակայն «Արի տուն» ծրագրի մասնակիցների մի մասն արդեն տոմսեր էր ձեռք բերել. սփյուռքահայերը վերջերս ԶԼՄ-ներով դժգոհել էին, որ ծրագրի չեղարկման հետեւանքով չեն կարողանում վերադարձնել ինքնաթիռի արդեն իսկ գնված տոմսերը: Խնդրի առնչությամբ այսօր Սփյուռքի փոխնախարար Դավիթ Սարգսյանը լրագրողների հետ հանդիպմանը հայտարարեց, որ 160 սփյուռքահայ չի կարողացել տոմսերը վերադարձնել կամ հետաձգել չվերթը:
«Վերջերս աշխատանքային խումբ է ստեղծվել, որը պետք է կազմակերպեր այդ երեխաների համար որոշակի ծրագրեր, ինչը եւ արվել է հաջողությամբ: Այն սփյուռքահայերի համար, որոնք չեն հասցրել տոմսերը հետ վերադարձնել ու ժամանել են ՀՀ, «Արի տուն» ծրագրի նման մի ծրագիր է իրականացվել՝ առանց ճամբարի: Ծրագիրը շուտով կավարտվի»,-հայտնեց Դավիթ Սարգսյանը:
Նրա գնահատմամբ՝ ծրագրի մասնակից պատանիներն ու երիտասարդները գոհ են եւ շատ ուրախ. «Եզրափակիչ միջոցառումը շատ հուզիչ էր: Երեխաներից երկուսը լացում էին, որ ավելի շուտ չեն կարողացել շփվել մյուսների հետ»:
Ինչ վերաբերում է ՀՀ-ում իշխանափոխությունից հետո հայրենադարձության ծավալներին, փոխնախարարը մշտական բնակության նպատակով հայրենիք վերադարձածների թվերի չէր տիրապետում, սակայն վստահեցրեց. «Շատերն են մեզ զանգում ու ասում, որ վստահում են ներկայիս իշխանություններին ու պատրաստ են հայրենիք վերադառնալ: Արձագանքները շատ են»:
Լուիզա ՍՈՒՔԻԱՍՅԱՆ
