Ինչպես տեղեկացել էինք՝ «Արթիկի Մոր և մանկան առողջության պահպանման կենտրոն» ՓԲԸ-ում հայտնաբերված չարաշահումների փաստով հարուցվել էր քրեական գործ։
2018թ. հուլիսի 6-ին ՀՀ ոստիկանության Շիրակի մարզային վարչության Արթիկի բաժնում օպերատիվ տվյալներ էին ստացվել, որ «Արթիկի Մոր և Մանկան ԱՊԿ» ՓԲԸ-ի տնօրենը, որպես սանիտար, աշխատանքի է հրամանագրել Արթիկ քաղաքի մի բնակչուհու, որը աշխատանքի չի հաճախել:
Նյութերի նախապատրաստման ընթացքում Ոստիկանության Արթիկի բաժնի կողմից ձեռնարկված միջոցառումներով պարզվել էր, որ տվյալ անձը «Արթիկի Մոր և Մանկան ԱՊԿ» ՓԲԸ-ում 2009թ. ընդունվել է աշխատանքի որպես սանիտար, աշխատանքի չի հաճախել, սակայն ստացել է աշխատանքային պայմանագրով սահմանված աշխատավարձի գումարները: Համապատասխան փաստաթղթերի ուսումնասիրությամբ պարզվել է, որ նրա անվամբ հաշվարկվել և վճարվել է ավելի քան 2 մլն 325 հազար ՀՀ դրամ գումար:
ՀՀ գլխավոր դատախազության լրատվական ծառայությունից այսօր Aravot.am-ին տեղեկացրեցին, որ 4 օր առաջ ենթադրյալ հանցանք կատարած անձի կողմից ամբողջությամբ վերականգնվել է պետությանը պատճառած վնասը՝ 2 միլիոն 325 հազար ՀՀ դրամի չափով։
Նունե ԱՐԵՎՇԱՏՅԱՆ
