ՀՀ նախկին վարչապետ Կարեն Կարապետյանի նախաձեռնությամբ վերանորոգված Գյումրու «Կումայրի» արգելոց- թանգարանի տարածքում գտնվող Ռուսթավելու անվան փողոցում կկառուցվի հանգստի գոտի՝ շատրվաններով, դեկորատիվ ծառատեսակներով։ Նախագիծն արդեն պատրաստ է, կա դեկորատիվ ծառատեսակների ցանկը՝ գինկգո, սակուրա, հորթենիզա, պռունուս, բարբարիս, թոիյա, կալինա, կանադական կարմի կլյոն, յունիփեռուս, սոճի և այլն (տես լուսանկարում)։
Այս մասին մեզ տեղեկացրեց Գյումրու գլխավոր ճարտարապետ Հենրիկ Գասպարյանը՝ պատասխանելով Aravot.am-ի այն հարցին, թե «Տաշիր Գրուպի» սեփականատեր Սամվել Կարապետյանը իշխանափոխությունից հետո շարունակելո՞ւ է իր ներդրումը Գյումրու զբոսաշրջային փողոցում։
Պարզվեց, սակայն, որ ռուսաստանաբնակ գործարարը մտափոխվել է, նրա գնած տարածքը, որտեղ ի սկզբանե քննարկում էին բազմաֆունկցիոնալ օբյեկտ կառուցելու հարցը, լինելու է օազիս քաղաքի բնակիչների ու զբոսաշրջիկների համար։
Իսկ ի՞նչ է լինելու այդ տարածքում գտնվող, ճարտարապետական արժեք ներկայացնող կիսաքանդ կառույցի հետ․ քաղաքային իշխանությունները ի սկզբանե Սամվել Կարապետյանին չեն թույլատրել այն քանդել, Հենրիկ Գասպարյանն ասաց․ «Դեռ հստակեցված չէ, սակայն այն միանշանակ վերանորոգվելու է՝ պահպանելով ճարտարապետական տեսքը»։
Նունե ԱՐԵՎՇԱՏՅԱՆ
