Պահպանակով՝ «ինչպես նոտաներով» կամ՝ առանց խնդիրների: Կիեւում, կարելի է ասել, պահպանակի օգտագործումն անխնա գովազդում են, նույնիսկ համոզում՝ «Ընտրեք լավ ու պարբերաբար սեքսը նվազագույն ռիսկով»՝ պահպանակով:
Հասկանալի է, որ նման գովազդները նախ հանրային առողջությանն են ուղղված, եւ հատկապես՝ ՄԻԱՎ/ՁԻԱՀ-ի կանխարգելմանը:
Հայաստանում նման սոցիալական գովազդ, ընդ որում, «բիլբորդերի» վրա գովազդներ չեք տեսնի, առավելեւս քարոզչություն՝ «պահպանակով ապահով սեքսի» մասին: Փոքրիկ ու «անտեսանելի» պաստառներ կգտնեք, որտեղ մանր տառերով ու աննկատ նկարով այդ մասին ակնարկվում է:
Տարիներ առաջ երբ ՀՀ-ում ընտանիքի պլանավորման ծրագիրն էր ներդրվում, «հայու գենի» պահապանները ընդդիմացան, թե բա՝ մեր ազգի բազմացման դեմ է: Հետո, երբ ժամանցի որոշ վայրերում պահպանակ գնելու ապարատներ տեղադրվեցին, կրկին «հայու գենի» պահպանները աղմուկ բարձրացրեցին՝ թե՝ մեր երիտասարդների շրջանում այս ի՞նչ եք քարոզում:
Բայց դե բժիշկները կհաստատեն, որ մեր բնակչության շրջանում սեռավարակները տարածված են, «ապահով սեքսի» մշակույթը ցածր է, «սեռական դաստիրակության» պակաս կա: Մինչդեռ նման խնդիրներ ունեցող երկրներում այս թեմայով սոցիալական գովազդները սովորական են, եւ կրթում են հասարակությանը:
Լուսանկարը՝ Նելլի Բաբայանի
«Առավոտ օրաթերթ»
04.08.2018
