Քննչական կոմիտեի Երեւան քաղաքի քննչական վարչության Կենտրոն եւ Նորք-Մարաշ վարչական շրջանների քննչական բաժնի ՀԿԳ քննիչ Ա. Մխիթարյանի 2018 թվականի օգոստոսի 2-ի որոշմամբ՝ «Շանտան» ՍՊԸ-ն ճանաչվել է տուժող՝ հյուրանոցի վերակառուցման աշխատանքների ընթացքում «Շանտան» ՍՊԸ-ին պատկանող թանկարժեք գույքը ոչնչացնելու կապակցությամբ:
Այս մասին «Առավոտին» տեղեկացրեց ընկերության հիմնադիր Հարություն Ղազարյանի փաստաբան Ալեքսանդր Սիրունյանը:
«Առավոտը» բազմիցս է գրել, որ Մաշտոցի 52 հասցեում, ԵՊՀ Հյուրերի տանը շինաշխատանքների պատճառով Շանտան» ՍՊԸ-ն կամ ավելի շատ հայտնի՝ «Պիլսներ Հաուս Գարեջրատուն Ռեստորան»-ի սեփականատերը մեծ վնասներ է կրել, սակայն իրավապահները աչք էին փակում այս հանգամանքի վրա:
Օրերս էլ «Առավոտ»-ն անդրադարձել էր այս խնդրին՝ նշելով, որ ԱԺ ՀՀԿ խմբակցության պատգամավոր Արկադի Համբարձումյանի (Դերժավայի Արկադ) հոր եւ գարեջրատուն ռեստորանի սեփականատիրոջ միջեւ իրավական վեճն այլ ընթացք է ստանում. քրեական գործ էր հարուցվել:
Մաշտոցի 52 հասցեում «Էս Էռ Հոթել» ընկերությունը Դերժավայի Արկադի հոր անունով է գրանցված, այս ընկերությունը ԵՊՀ Հյուրերի տան շենքը, ճարտարապետների բնութագրմամբ՝ աղավաղելով, «Քրոուն պլազա» հյուրանոցն է կառուցում: Ընկերությունը շինաշխատանքները սկսել էր առանց Երեւանի քաղաքապետարանից շինթույլտվություն ստանալու: ԵՊՀ Հյուրերի տան նկուղային հարկում էր գտնվում գարեջրատուն-ռեստորանը: Գարեջրատան սեփականատեր Հարություն Ղազարյանը պնդում է՝ այս շինարարության արդյունքում 25 միլիոն դրամի վնաս է կրել, այս առթիվ էլ վերջերս քրեական գործ է հարուցվել:
Բացի այս, Սիրունյանը նաեւ պնդում է եւ մտահոգություն էր հայտնել Երեւան քաղաքի դատախազին, որ նշված հյուրանոցային համալիրը «Էս Էռ Հոթել» ընկերությունը ձեռք է բերել ակնհայտ ցածր գնով. «Դրա քառակուսի մետրի 1400 դոլար գինն արժանահավատ չէ, պետական գույքը վաճառվել է ակնհայտ ցածր գնով»:
Փաստաբան Սիրունյանն օրեր առաջ մեզ հետ զրույցում ասել էր, որ իրավապահ մարմիններին դիմելուց հետո կատարվել է հետաքննություն, սակայն առայժմ քրեական գործ է հարուցվել միայն գույքը ոչնչացնելու փաստով:
Հիմա արդեն «Շանտան» ՍՊԸ-ին իրավապահները ճանաչել են տուժող:
Նելլի Բաբայան
«Առավոտ» օրաթերթ,
03.08.2018
