Ըստ քաղաքագետ Արա Պապյանի՝ ՀՀ երկրորդ նախագահ Ռոբերտ Քոչարյանի կալանավորումը դեռ չի նշանակում, թե այդ խափանման միջոցը մշտապես պահպանվելու է, կամ դատարանն անպայման որոշելու է, որ նա մեղավոր է: «Վերջնական վճիռը դատարանինն է, բայց այս պահին հարմար են գտել կալանավորումը, որպեսզի հնարավոր լինի հետաքննություն իրականացնել՝ առանց որեւէ ազդեցությունների»,- «Առավոտ»-ի հետ զրույցում ասում է Արա Պապյանը: Հետաքրքրվեցինք, թե իր դիտարկմամբ՝ Ռուսաստանը դժգո՞հ է այն փաստից, որ ՀՀ երկրորդ նախագահի եւ ՀԱՊԿ գլխավոր քարտուղար Յուրի Խաչատուրովի հանդեպ քրեական հետապնդում է իրականացվում: «Ներկայում ՀԱՊԿ գլխավոր քարտուղարի այդ պաշտոնը ՀՀ-ին է տրված: Որեւէ տեղ արձանագրվա՞ծ է, թե դա Խաչատուրովի տեղն է՝ ոչ, դա ՀՀ-ի տեղն է: Հետեւաբար ՀՀ իշխանությունները ցանկացած պահի կարող են փոխարինել իրենց ներկայացուցչին: Խաչատուրովը ՀՀ քաղաքացի է եւ որեւէ առնչություն չունի Ռուսաստանի հետ: Հետեւաբար Ռուսաստանի միջամտությունը Խաչատուրովի, նաեւ՝ Ռոբերտ Քոչարյանի գործերին առնվազն տարօրինակ է: Նրանք ՀՀ քաղաքացիներ են, որոնք, ենթադրաբար, ՀՀ օրենքներ են խախտել: Որեւէ մեկը, առավել եւս՝ օտար երկրի ԱԳ նախարար, բացի հայաստանյան դատարանից, իրավունք չունի տեսակետ հայտնելու այս հարցի շուրջ»,- պատասխանեց Արա Պապյանը:
Լուիզա ՍՈՒՔԻԱՍՅԱՆ
«Առավոտ» օրաթերթ,
02.08.2018
