Aravot.am-ի տեղեկություններով, Փաշինյան-Պուտին զրույցի ժամանակ ՀՀ վարչապետը ՌԴ նախագահին ակնարկել է, որ տեղյակ է Պուտին-Քոչարյան հանդիպումներից եւ դրանց բովանդակությունից: Այս զրույցը ՀՀ վարչապետ Նիկոլ Փաշինյանի եւ ՌԴ նախագահ Վլադիմիր Պուտինի միջեւ տեղի է ունեցել հունիսի կեսին՝ ֆուտբոլի Աշխարհի առաջնության բացման հանդիսավոր արարողությունից առաջ:
Պուտինն արձագանքելով Փաշինյանին, նրա հետ զրույցում չի թաքցրել Քոչարյանի հետ իր մտերիմ հարաբերությունները: Պուտինը Փաշինյանին խոստովանել է, որ Ռոբերտ Քոչարյանի հետ ընկերական հանդիպումներ ունեցել է նրա պաշտոնաթողությունից հետո:
Հիշեցնենք, որ ՀՔԾ-ն Մարտի 1-ի գործով մեղադրանք էր առաջադրել ՀՀ 2-րդ նախագահ Ռոբերտ Քոչարյանին: Արդեն հուլիսի 28-ին դատարանը որոշեց Քոչարյանին 2 ամսով կալանավորել:
Փաշինյան-Պուտին այս զրույցի մասին Aravot.am-ը մեկնաբանություն խնդրեց վարչապետի մամուլի խոսնակ Արման Եղոյանից: Վերջինս հրաժարվեց մեկնաբանություն տալ, նշելով՝ Փաշինյան-Պուտին հանդիպումը փակ է եղել:
Նելլի ԲԱԲԱՅԱՆ
