Ալին Փանոյանը, ի թիվս այլ սփյուռքյան կրթական հաստատությունների ներկայացուցիչների Հայաստան է ժամանել Սիրիայից: Նա Երեւանում է Համահայկական 8-րդ կրթական խորհրդաժողովին մասնակցելու համար: Փանոյանը 25 տարի է դասավանդում է Հալեպի Մխիթարյան վարժարանում: Ուսուցչուհին Aravot.am-ի հետ զրույցում նշեց, որ տարիներ ձգված սիրիական պատերազմի ընթացքում հայկական որոշ դպրոցներ նյութական մեծ վնասներ են կրել, իսկ աշակերտները տեղափոխվել են ավելի ապահով շրջաններում գտնվող դպրոցներ: Աշակերտների թիվը հայահոծ այդ համայնքում նվազել է, քանի որ ընտանիքները արտագաղթել են երկրից:
Ուսուցչուհին նշեց, որ թեեւ շատերը հեռացել են երկրից պատերազմի պատճառով, տեղի հայկական դպրոցները գոյատեւում են` հայապահպանման, ազգային դաստիարակության իրենց առաքելությունը շարունակելով:
Ջավախքի երիտասարդական կենտրոնների ուսումնական մասի համակարգող Կարինե Թադեւոսյանն էլ լրագրողների հետ զրույցում անդրադառնալով սեպտեմբերի 1-ից հայոց լեզվի դասաժամերի կրճատմանը՝ հայտնեց. «Ջավախքում կրթական եւ հայապահպանության հարցում խնդիրներ միշտ եղել են , ներկայումս էլ կա այդ խնդիրը, որ հայկական ոչ մի դպրոցում հայոց պատմություն առարկան չի դասավանդում, իսկ հայերենի դասաժամերն այնքան քիչ են, որ համահավասար են, օրինակ, անգլերենի դասաժամերին»:
Տիկին Թադեւոսյանը նշեց, որ հույս ունեն, թե խորհրդաժողովը գուցե կքննարկի այս հարցը, եւ Հայաստանի ու Վրաստանի կրթության նախարարներն ի վերջո համատեղ լուծում կգտնեն, որպեսզի Ջավախքում եւ ընդհանրապես Վրաստանում ապրող հայ երեխան կարողանա սովորել իր պատմությունը, հայոց լեզուն, հայ գրականությունը:
Ջավախքի երիտասարդական կենտրոնների ուսումնական մասի համակարգողը նշեց, որ խնդրի առնչությամբ Վրաստանի ԿԳ նախարարությունում պարզաբանել են, որ հարցը թողնված է դպրոցների պատասխանատուների հայեցողությանը, եւ նրանք են որոշում դասաժամեր տրամադրել: Տիկին Թադեւոսյանը հայտնեց, որ թեեւ հարցը բարձրաձայնվել է, սակայն մինչ օրս ոչ մի քայլ չի կատարվում:
Հայոց պատմության ուսուցման բացը Ջավախքում եւ ողջ Վրաստանում կա, լրացվում է Ջավախքում` երիտասարդական կրթամշակութային կենտրոնների, Թբիլիսիում` Հայարտան, Նինոծմինդայում` Հայարտամ, Ախալցխայում եւ Ախլքալաքում` երիտասարդական կենտրոնների միջոցով, որտեղ դասավանդվում է հայոց պատմություն: Դրա շնորհիվ Վրաստանի հայազգի երեխաները մասնակցում են մասնակցում են ՀՀ ԿԳ նախարարության կազմակերպած հայագիտական օլիմպիադաներին:
Գոհար ՀԱԿՈԲՅԱՆ
